Засгийн газраас өргөн барьсан 2025 оны төсвийн төсөл УИХ-д орж ирсэн, хэлэлцүүлэг хийж эхэлсэн цагаас эхлэн "Хавдрын эмнэлгээ бариач ээ. Хавдраар нас барж байгаа иргэдэд эмчилгээ, оношилгоо хүрэлцэхгүй байна шүү. Хавдраар өвчилсөн хүн бүр гадаад явж өндөр төлбөртэй эмчилгээ, үйлчилгээ авах боломжгүй байна" гэдэг шаардлагыг хэлж, ятгаж, гуйсаар өдийг хүрсэн. Угаасаа жил бүрийн төсөв дээр яригддаг, улиг болсон хэрнээ шийдэлд хүрэлгүй өдий хүрсэн асуудал.

Гэтэл өчигдөр УИХ-ын Нийгмийн бодлогын байнгын хороо Эрүүл мэндийн даатгалын Үндэсний зөвлөлийн 2023 оны ажлын тайланг хэлэлцжээ. Энэ үеэр Эрүүл мэндийн сайд Т.Мөнхсайхан нэгэн болчимгүй мэдэгдлийг хийв. 

Тодруулбал, "Хавдрын эмнэлэг барих ажлыг аль болох хурдлуулахыг хичээж байна. Бид яарч байж, даарах вий. Хавдрын эмнэлэг бариад ашиглалтад ороход гарах зардал урьдчилсан байдлаар 140 сая ам.долларын тооцоолол гарсан. Өөрөөр хэлбэл 400-500 тэрбум төгрөгийн асуудал яригдаж байна. Хавдрын эмнэлэг барилаа гээд хавдрууд эрт оношлогдох уу, иргэд хавдраар өвчлөхөө больчих юм уу. Өвчнөөр улс төр хийж болохгүй" гэжээ.

Энэ бол салбар хариуцаж байгаа сайд хүний хэлэх үг биш. Төсөв бүрдүүлж байгаа гэдэг утгаараа Сангийн сайд ингэж хэлсэн бол нэг хэрэг. Харин Эрүүл мэндийн сайдын хувьд эмнэлэг, эмчлүүлэгчийнхээ талд байх ёстой. Хавдрын өвчлөлөөс урьдчилан сэргийлэх нь чухал боловч нэгэнт өвчилсөн хүмүүсийг эмчлэх нь нэгдүгээр асуудал. Эрүүл мэндийн сайд хүн үүнд яарахгүй бол өөр юунд яарах ёстой гэж.

Тэгээд яарснаас болж яг ямар асуудал үүсэх гээд байгаа нь бүр ч ойлгомжгүй байна. Харин ч яарснаас биш, оройтсоноос бол жил бүр хавдраар өвчлөгсдийн тоо 6000 хол даваад (2022 оны байдлаар 6888) 7000 руу ороод ирчихлээ. Нас баралт жил бүр 4000 хол даваад явж байна. Тэгээд үүн дотор насанд хүрээгүй хүүхдийн өвчлөл, нас баралт жил ирэх тусам нэмэгдэж байна. Энэ тэгээд яарахгүй байх шалтгаан мөн гэж үү? "Хавдрын эмнэлгээ бариач ээ, хүн үхээд байна аа" гэхээр "өвчнөөр улс төр хийлээ" гэж уурлаж байгаа хүнтэй яг ямар хэлээр ярих ёстой вэ?

Б.ЗАЯА