Аймаг, сум, нийслэл, дүүргийн ИТХ-ыг сонгох сонгуулийн сурталчилгааны хугацаа талдаа оров. Энэ сарын 11-нд ээлжит сонгуулийн санал хураалт болно. Ес дэх удаагийн сонгуульд 15 нам, нэг эвсэл оролцож, 2393 тойрогт 8031 мандатын төлөө өрсөлдөж байгаа. Гэвч гол өрсөлдөөн улс төрийн хоёр том нам болох МАН, АН-ын хооронд болж байна. МАН-ын хувьд нийслэлчүүдэд зориулсан тодорхой бодлого, хөтөлбөр дэвшүүлээгүй бол АН-аас "Хүүхдэд ээлтэй хот" болох зорилт дэвшүүлжээ. 

Гэвч сурталчилгааны дунд үеэс Нийслэлд нэр дэвшиж байгаа АН-ын залуус руу чиглэсэн "хар пиар" идэвхжиж эхэллээ. Тухайлбал, "АН сонгуульд ялбал Х.Баттулгын хулгай луйвар л үргэлжилнэ. Нийслэлийн эрх мэдэл, төсөв мөнгө энэ жилээс асар нэмэгдсэн. Женко ажил хийх гэж биш, хулгай хийх гэж улайрч байна" гэх ухуулгыг нийгмийн сүлжээгээр хайр найргүй цацаж байна. Уг мэдээллийн эх үүсвэрийг нь нэхээд харвал хаанаас эхтэй, ямар зорилготой болох нь тодорхой.

Сонгуулийн сурталчилгаа эхлэхээс өмнө хотын дарга Х.Нямбаатар "бордюраар хулгай хийхээ болиоч ээ" гэсэн иргэдийн шүүмжлэлийг (уг нь бол зүй ёсны юм) эсэргүүцэж, "Х.Баттулгын троллууд над руу дайрч байна" хэмээн өдөр өнжилгүй лайв хийсэн. Өөрсдийнх нь буруу, булхайг хэлэх бүрт өөр нэг "дайсан" гаргаж ирээд түүнтэйгээ дайтаж эхэлдэг нь МАН-ын дарга нарын арга заль, бараг мораль болчихоод байгаа.

УИХ-ын сонгуулиар иргэдийн зүгээс ногоон автобус, нүүрсний хулгайг сануулахад МАН-ын дарга нар, пиарчид зөрүүлээд долоон жилийн өмнө суудлаасаа буугаад явсан экс Ерөнхийлөгч Ц.Элбэгдоржийг ард түмний дайсан болгосон. "Элбэгдоржийн мафи, С.Зоригийн хэрэг" гэдэг аалзны тор зурж байгаад АН-ын бүх нэр дэвшигчдийг тэр торондоо чихсэн. Харин өнөөдөр орон нутгийн сонгууль дээр "Х.Баттулгын мафи" гэх бас нэг домог гаргаж ирээд АН-ын нэр дэвшигчдийг соошлаар буллидаж байна. 

Мэдээж Х.Баттулга нь сайхан амьтан биш. 44 их наядын нүүрсний хулгайд АН-ын талаас оролцсон ганц хүн нь. ҮАБЗ-ийн гурван гишүүний нэг учраас. Гэвч нөгөө хоёр нь ч гэсэн их, бага хэмжээгээр оролцоотой учраас Х.Баттулга гэдэг хүн өнөөдөр наранд явж байгаа. Х.Баттулга өнөөдөр төр улсын тэргүүн биш, УИХ-ын сул гишүүн. Түүнд ямар ч эрх мэдэл байхгүй. Эрх мэдэл зөвхөн МАН-д байгаа. Хамтарсан засагт орсон АН-ын найман сайдад ч эрх мэдэл байхгүй. Тийм болохоор МАН хэрвээ Х.Баттулгатай ял хэлэлцэх гэж байгаа бол хариултыг нь өөрсдөөсөө хайх хэрэгтэй, иргэдээс биш. Яагаад энэ хүн сул чөлөөтэй явж яваа юм бэ? гэдгийг өөрсдөөсөө асуу.

Хоёрдугаарт, Х.Баттулга АН-д нөлөөтэй байсан цаг бий, Ерөнхийлөгч байхдаа. Одоо бол УИХ-ын гишүүний бүрэн эрхийн ард нуугдсан эрх мэдэлгүй нэг л өвгөн. Ээлжит бус чуулганы үеэр намын бүлгийнхээ хуралд ганцхан удаа суухдаа бүлгийн дарга хэн байхыг заах гэж үзээд залуу гишүүддээ загнуулаад гарсан гэсэн. Ерөнхийлөгч байхад нь Х.Баттулгын нөөлгөн дор явсан олон хүн шоронгийн хаалга татсан нь үнэн, Х.Баттулгын өмнөөс ялыг нь үүрсэн ч байх. Одоо дахиад Х.Баттулгын шуналын төлөө толгойгоо цустах залуучууд АН-аас гарах уу, эрүүл ухаантай хүн тийм замаар явах уу? АН дотор Х.Баттулгын цаг үе хэдийн дууссан. Х.Баттулгын байтугай Л.Гантөмөрийн үе дуусчихаад байна.

Тэгэхээр энэ бол УИХ-ийн сонгуулиар Ц.Элбэгдоржоор ард түмнийг айлгаж байсан МАН орон нутаг дээр "мешок"-оо сольсон төдий. Ц.Элбэгдорж гэдэг "мануухайг" дахиж ашиглах боломжгүй болтол нь тээрэмдчихсэн учраас шинэ "мануухай" хэрэгтэй болж, тэр нь Х.Баттулга. Мууг сонгохын тулд илүү мууг харуулах ёстой. Гэвч Х.Нямбаатартай жишчихээр илүү дор хүн АН-аас харагдахгүй байна л даа.

Б.ЗАЯА