УИХ-д хамгийн олон суудал авсан МАН, АН, ХҮН хамтарч Засгийн газраа байгуулаад гурав дахь сардаа орж байна. Гэсэн хэдий ч хамтарсан Засгийн газарт орсон АН-ын сайд нарын хувьд уригдаж ирсэн сайд биш, хатавчинд суусан хүүхэд шиг амьдарч байна. Учир нь АН-аас томилогдсон сайд нарт хариуцсан яам, агентлагтаа томилгоо хийх эрх мэдэл байхгүй, бүх эрх мэдлийг МАН-ын дарга, Ерөнхий сайд гартаа авсан.

Тухайлбал, Ерөнхий сайд Л.Оюун-Эрдэнэ хамтарсан Засгийн газрыг байгуулахдаа "Эдийн засгийн хөгжлийн бодлого, хууль эрх зүйн шинэтгэлийг асуудлыг АН-д хариуцууллаа" гэж мэдэгдсэн. Гэтэл хууль эрх зүйн шинэчлэлийг хариуцсан ХЗДХ-ийн сайд О.Алтангэрэлийн хувьд үлгэрлэвэл "чаа гэх ямаагүй, туу гэх нохойгүй" үлдсэн сураг дуулдах болов. Өмнө нь тус яаманд ажиллаж байсан хуульч мэргэжилтнүүд, хуулийн төсөл дээр суудаг мэргэжлийн баг нь сонгуулийн дараа тарж бутраад, нэг хэсэг нь хуучин сайдаа дагаад нийслэл рүү, нэг хэсэг нь УИХ руу, үлдсэн хэсэг нь ЗГХЭГ руу шилжээд явчихсан юм байна. Үлдсэн хэд нь өнөө маргаашгүй шилжихээр хүсэлтээ өгчихсөн. Орных нь хүнийг томильё гэхээр сайдын эрх мэдэл хүрдэггүй, МАН-аас томилогдсон төрийн нарийн бичгийн дарга нь хөдөлж өгдөггүй. Ийм нэг гачлантай амьдралыг АН-аас томилогдсон сайд нар туулж байна. 

Уг нь анх Засгийн газрыг байгуулахдаа хоёр том нам "Засгийн газарт хийсэн томилгооны харьцааг гүйцэтгэх эрх мэдлийн бүх шат, төрийн захиргааны байгуулагуудад яг адилхан хадгална" гэдэг зарчим ярьж, зөвшилцөл хийсэн. Гэсэн ч МАН "төрийн мэргэшсэн албан хаагч" гэдгээр шалтаглан төрийн нарийнуудаа татаж авдаггүй, төрийн нарийнууд нь шаардлагатай томилгоог хийж өгдөггүй учраас АН-аас томилогдсон сайд нар жинхэнээсээ "морь унасан толгойгүй хүн" болчихоод байна.

Б.ЖАРГАЛ