Зэвсэгт хүчний 326-р ангид алба хааж байсан 21 настай цэрэг энэ сарын 13-ны өдөр амь насаа алдсан харамсалтай хэрэг гарсан. Үүнтэй холбогдуулан Батлан хамгаалахын сайд Г.Сайханбаяр Засгийн газрын хуралдаанаар цэрэг яагаад амиа алдсан талаар мэдээлэл өгчээ. 

Хуралдааны дараа Засгийн газраас ХЭҮК-той хамтран бүх цэргийн ангид шалгалт хийх шуурхай Ажлын хэсэг байгуулсан юм. 

Мөн Батлан хамгаалахын сайд Г.Сайханбаяр сэтгүүлчдэд дараах мэдээллийг өглөө. 

Тэрээр "Зэвсэгт хүчний 326 дугаар анги дээр болсон явдлыг цагдаагийн байгууллага ажиллаж байна. Бүх мэдээллийг нээлттэй өгч байгаа. 

Мөн анги байгууллага, цэргийн алба хаагчдын харилцааны зөрчилтэй холбоотой гэмт хэргийн шинж чанартай асуудал гарвал бүх шатны албан тушаалтан болон би өөрөө хариуцлага хүлээхэд бэлэн байна. Ямар шалтгааны улмаас гэдгийг л тогтоох хэрэгтэй. Цэргийн анги салбар дээр дэглэлт, яргалалт байхгүй. Энэ бол гүтгэлэг. Ард түмний толгойг эргүүлсэн, ард иргэдийг хагалан бутаргах гэсэн санаатай зүйл яваад байна гэж би үзэж байна. 

Хуульд оюутан цэргийн албанаас чөлөөлөгдөнө гэсэн заалт байхгүй. Цэрэг татлагын протоколыг бид үзсэн. Өнөөдөр цэргийн албанд татагдсан залуучуудын 21 хувь нь оюутан.

Зэвсэгт хүчний анги салбаруудад олон жилийн элэгдэлд орсон. Тухайн ангийн хувьд цонх хагарсан цуурсан асуудал байна лээ. Тэр бол анги хариуцсан захирагч дарга нарын ажилтай холбоотой" гэлээ.