Монголын Хуульчдын холбооноос хоёр дахь жилдээ хийж буй Хуульчдын форумыг маргааш буюу зургадугаар сарын 19-нд “Тогтвортой хөгжлийн зорилтууд-Хуульчдын оролцоо” уриан дор зохион байгуулах гэж байна.
Форумын үндсэн хуралдааныг “Үндсэн хуулийн эрх зүй ба цаашдын чиг хандлага” сэдвээр явуулж “Хараат бус шүүх ба хууль дээдлэх ёс”, “Хуульчийн ёс зүй ба хариуцлага”, “Хүний эрх ба цахим ертөнц”, “Эрүүгийн хууль тогтоомжийн хэрэгжилт, тулгамдаж буй асуудал”, “Үндэстэн дамнасан хууль зүйн туслалцаа”, “Чанартай хууль зүйн боловсрол: магадлан итгэмжлэл ба үргэлжилсэн сургалт”, “Хөрөнгийн ба санхүүгийн зах зээлийн эрх зүйн хөгжил”, “Хариуцлагатай уул уурхай: Нөхөн сэргээх асуудал” гэсэн найман салбар хуралдааныг зохион байгуулах юм байна. Хуульчдын форумаас гарсан санал санаачилга тус бүрийг нэгтгэн зөвлөмж хэлбэрээр хууль тогтоогч, шийдвэр гаргагч нарт хүргүүлэхийн зэрэгцээ олон нийтэд танилцуулах аж.
Форумын хүндэт зочноор Гадаад явдлын сайд асан Ц.Гомбосүрэн уригдаж, Эдийн засагч, нийтлэлч Д.Жаргалсайхан болон МУИС-ийн Хууль зүйн сургуулийн профессор, хууль зүйн шинжлэх ухааны доктор Ц.Сарантуяа, Үндсэн хуулийн цэцийн гишүүн Д.Ганзориг, Хууль зүйн доктор Б.Гүнбилэг, Захиргааны хэргийн давж заалдах шатны шүүхийн шүүгч, хууль зүйн доктор Ц.Цогт нарын 40 гаруй хуульч, эрдэмтэд энэ форумын илтгэгч, хэлэлцүүлэгчээр оролцох юм байна.
