УИХ-ын бүрэн эрхийг хугацааг дуусгавар болголгүй тарааж, ээлжит бус сонгууль зарлан явуулах тухай асуудал яригдаж эхэллээ. Зарим нэг хэвлэл мэдээллийн хэрэгслээр УИХ-ын ээлжит бус сонгууль явуулахыг дэмжсэн гишүүдийн нэрсийг зарлав. Ерөнхийлөгчийн зүгээс Үндсэн хуульд оруулах нэмэлт, өөрчлөлтийн төсөлд гишүүдийн тоог 108 болгож, бүрэн эрхийн хугацааг нь таван жил болгох, сонгуулийг холимог системээр явуулдаг байх зэрэг өөрчлөлтүүдийг оруулах эс бөгөөс Их хурлыг өөрөө тар хэмээн шахсан гэх яриа ч бий.
Ямартай ч МАН-ын бүлэг уг асуудлаар хоёр хуваагдаад байгаа бололтой. Д.Хаянхярваа гишүүн тухайлбал, "Хугацаанаасаа өмнө тарах тухай намын генсек болоод зарим хүмүүс УИХ-ын гишүүдтэй уулзаж гарын үсэг зуруулж байгаа юм байна. Нам нь оролцож төрөө үймүүлж байна шүү" хэмээн жиргэсэн байна. Энэ тухай санаачлага МАН-ын удирдлагын зүгээс гарчээ гэсэн үг. Үүний баталгаа болж УИХ-ын даргын амнаас “УИХ-ыг тарааж, ээлжит бус сонгууль хийх асуудал яригдаж байгаа” гэх үг ч унасан байна.
Харин гарын үсэг зурсан гэгдээд байгаа гишүүдийн нэг болох Л.Энхболд ингэж ярьжээ.
-Аль нэг гишүүний албан бланк дээр гарын үсэг зуруулж байгаа зүйл байхгүй байх. УИХ-ын дарга хэвлэлийнхэнтэй уулзахдаа эсвэл даргын зөвлөл дээр тиймэрхүү санал оруулж ирж, ярилцсан зүйл байгаа юм болов уу гэж ойлгосон. Гарын үсэг зураад, баталгаажуулсан зүйл бол байхгүй. Ард нийтийн санал асуулга зохион байгуулахад тодорхой хэмжээний зардал гарна. Хэдхэн сарын дараа ээлжит сонгууль болж дахиад зардал гарна. Тиймээс эдийн засгийн хувьд ач холбогдолтой гэж үзэх юм бол Үндсэн хуулийн өөрчлөлтийн талаарх ард нийтийн санал асуулга болон УИХ-ыг тараах эсэхийг шийдэх санал асуулгыг цуг явуулахад болохгүй зүйл байхгүй. УИХ-ыг тараах асуудллыг иргэд дэмжвэл шинэ парламент Үндсэн хуульд оруулах нэмэлт, өөрчлөлтийн төслийн дараагийн хэлэлцүүлгийг хийх байх. Үүнээс гадна Ард нийтийн санал асуулгыг ирэх зургаадугаар сард УИХ-ын ээлжит сонгуультай хамт явуулах хувилбар байхыг үгүйсгэхгүй. Гол нь парламент тарвал үүсч болох сөрөг үр дагаварыг сайн тооцоолох шаардлагатай. Энэ парламент үлдсэн хугацаандаа эрх зүйн хувьсгал хийж чадахгүй бол эртхэн шиг тараад, шинээр парламент бүрдүүлээд явах нь зүйтэй гэсэн байна.
