Дөнгөж сая ЦЕГ-ийн Хар тамхитай тэмцэх газраас мэдээлэл хийлээ.

Оны эхний есөн сарын байдлаар /есдүгээр сарын 16/ Монгол улсад, хар тамхи, мансууруулах бодистой холбоотой 197 гэмт хэрэг бүртгэгдэж, эдгээр хэрэгт 333 хүн холбогдон шалгагдаж байгаа юм байна. 

Орон нутагт энэ төрлийн гэмт хэргийн 23 тохиолдол бүртгэгдсэний 13 нь Орхон аймаг, гурав нь Сэлэнгэ аймаг, Дархан-Уул, Булган, Төв, Дорнод, Өмнөговь аймагт тус бүр нэг гэмт хэрэг бүртгэгджээ. 

Хар тамхи, мансууруулах эм бэлдмэлтэй холбоотой гэмт хэрэг өмнөх оны мөн үетэй харьцуулбал 30 орчим хувь, гэмт хэрэгт холбогдогчдын тоо 20 гаруй хувиар нэмэгдэж, хөдөө орон нутаг рүү хүрээгээ тэлж байгааг цагдаагийн байгууллагаас анхаарууллаа.

Оны эхний есөн сард хар тамхи, мансууруулах бодис, сэтгэцэд нөлөөлөх эм бэлдмэлийг Монгол Улсын хилээр оруулах гэсэн 17 үйлдэл бүртгэгдсэний 11-ийг нь олон улсын шуудан илгээмжээр нэвтрүүлэхийг завджээ. Дээрх төрлийн илгээмжүүд Тайланд, Нидерланд, Германи, Испани, Хятад АНУ-аас илгээгдсэн байна.

Гаалийн хяналтын газраас 2019 оны эхний есөн сард Монгол Улсын хилээр хар тамхи, мансууруулах бодис нэвтрүүлэх гэсэн есөн удаагийн тохиолдлыг илрүүлж, 4,5 кг хар тамхийг хураан авч хууль хяналтын байгууллагад шилжүүлсэн байна. Уг хэрэгт холбогдсон арван иргэний нэг нь гадаадын иргэн байжээ. Хураагдсан хар тамхи, мансууруулах төрлийн бодисын нэр төрөл, хэмжээ жил ирэх тусам нэмэгдсээр байгаа бөгөөд энэ санхүүгийн жилд багтаан гаалийн хяналтын бүх боомтыг хар тамх, мансууруулах бодис таних төхөөрөмжөөр тоноглож дуусгана гэж Гаалийн хяналтын газраас мэдэгдлээ.