Энэ жилийн хувьд нийслэлчүүд анх удаа түүхий нүүрс бус, сайжруулсан шахмал түлш хэрэглэхээр Засгийн газраас шийдвэрлэсэн. Мөн шахмал түлшийг энэ сарын 15-наас эхлэн Улаанбаатар хотын хэмжээнд 540 цэгээр борлуулахаар болсон тухай өмнө мэдээлсэн билээ.
Одоогийн байдлаар нийслэлд сайжруулсан түлш борлуулах дундын 40 цэг байгуулагдсан. Дахин 14 бөөний цэгийг нээхээр ажиллаж байгаа юм байна. Мөн жижиглэн борлуулалтын 530 гаруй цэг байгуулах ёстой. Одоогоор 160 гаруй мянган тонн түлш үйлдвэрлэж, 30 орчим мянган тонныг нь гэрээт цэгүүдэд хүргэсэн байна.
Түгээлт, нийлүүлэлттэй холбоотой бүх ажил дээр нийслэлийн Засаг даргын захирамжаар 24 цагийн хариуцлагатай жижүүр гарган ажиллуулж эхэлжээ. Түгээлтийн ажилд ААН-үүдээс гадна хорооны хэсгийн ахлагчдыг татан оролцуулж, 4000 гаруй сайн дурын ажилтан ажиллуулах юм байна.
Энэ сардаа багтаан нийт 60 мянган тонн түлшийг иргэдэд нийлүүлэхээр төлөвлөсөн. Ирэх саруудад нийлүүлэлтийн хэмжээ нэмэгдээд явна гэдэг мэдээллийг Нийслэлийн Засаг дарга бөгөөд Улаанбаатар хотын захирагч С.Амарсайхан өглөө.
