Ц.Нямдорж: Чи хэн болчихсон юм?
Д.Ганболд: Ганц өдөр гадагшаа явж болдоггүй юм уу...

Өнгөрөгч долоо хоногийн баасан гаригт УИХ-ын нэгдсэн чуулган ирцгүй шахам хуралдаж, УИХ-ын гишүүд, сайд нар Үндсэн хуулийн нэмэлт өөрчлөлтийн хэлэлцүүлэг тасалсан билээ.

Энэ үеэр Хууль зүй, дотоод хэргийн сайд, "шударга" гишүүн Ц.Нямдорж "Улс орны амин чухал эрх ашгийн суудал, магадгүй дараачийн 10 жилд ярих бололцоогүй ийм асуудал ярьж байхад  гишүүд яагаад хуралдаандаа ирдэггүй юм. Хэн болчихсон юм? Албан тушаал ярихаар би би гэж давхидаг, төрийн, ард түмний амин чухал эрх ашгийн асуудал ярихаар яагаад ирдэггүй юм. Чингэлтэйгээс сонгогдсон Д.Ганболд гишүүн Үндсэн хуулийн асуудал хэлэлцэнэ гэдгийг мэдсээр байж онгоцонд суугаад алга болсон гэж байна лээ.  Бид нар та  нараас ичиж байна" хэмээн загнасан.

Тэгвэл УИХ-ын гишүүн Д.Ганболд чуулганы хуралдаан тасалсан шалтгаанаа өнөөдөр "Өдрийн сонин"-д тайлбарласан байна. Тэрээр "Би эмнэлэгт үзүүлэх цаг авчихсан байсан учраас ганцхан өдөр гадагшаа явсан" хэмээн өөрийгөө өмөөрчээ. Үүний өмнө ЗГХЭГ-ын дарга Л.Оюун-Эрдэнэ "хоолны хордлого" болсон гээд Солонгос руу нисч байв. Сүүлдээ хоолны хордлого нь хөлөндөө орсон, зориудаар хордуулсан... гэх мэт хошин шогийн үзэгдэл шиг зүйлсийг мэдээллийн сайтуудаар цацаж байлаа.

Ингэхэд эрүүл мэндийн салбар, иргэдэд үзүүлэх үйлчилгээ жил ирэх тутам унан доройтож байдгийн уг шалтгаан манай эрх баригчдад байна. Өөрсдөө өвдөхөөрөө (эсвэл зүгээр л шинжилгээ хийлгэх нэрээр) улсын зардлаар гадагшаа нисч байгаа нөхдөд дотоодын эмнэлгүүд ямар нөхцөлд яаж ажиллах нь падлий ч үгүй байж таарна. Ингэхэд Л.Ганболд гишүүний гадагшаа ниссэн ганц өдрийн зардлаар дотоодын эмнэлэгт хэдэн хүнд шинжилгээ хийж, эмчилгээ үйлчилгээ үзүүлж болох байсан бол?

Б.ГАЛ