Шатахууны хомсдол, үнийн өсөлт хэдэн сараар үргэлжилсэний улмаас иргэд эсэргүүцлээ илэрхийлж эхэллээ. Нийслэлчүүд өнөөдөр өглөө 10 цагаас эхлэн хотын төв талбайд машинтайгаа гарч жагсаал хийв. 

Сүхбаатарын талбайн баруун, зүүн талд автомашинууд цувран зогсож, жолооч нар машинаасаа бууж, хөдөлгөөнгүй зогсон эсэргүүцлээ илэрхийллээ. Жолооч нар автомашиныхаа дуут дохиог дуугарган бухимдлаа илэрхийлэв. Төв талбайд жолооч нараас гадна оюутан залуус, ахмад настнууд ч цугласан байна.

Сүүлийн саруудад шатахуун хомсодсоны  улмаас жолооч нар машиндаа хонож, өнжин дугаарлаж, зарим нь шатахуунаа өндөр үнээр шаглаж авахаас аргагүйд хүрээд байгаа. Засгийн газраас "шаардлагатай бүхий л арга хэмжээг авч байна" гэж мэдэгддэг ч шатахуууны хомсдлыг дагаж өргөн хэрэглээний бараа, бүтээгдэхүүний үнэ нэмэгдэж, инфляцийн дарамт өрхийн амьжиргааг доош татсаар байна.

Хонины махны үнэ сүүлийн нэг жилийн дотор 10 мянга орчим төгрөгөөр нэмэгдсэн бол үхрийн цул мах нэг кг нь 40 мянган төгрөгт хүрсэн. Хүнсний ногоо, гурил, будаа гээд өргөн хэрэглээний бүхий л бүтээгдэхүүн зогсолтгүй өсч байгаа. Жагсагчид "Татварын дарамт, үнийн хөөрөгдлөөс болоод Монголд амьдрах боломж улам бүр хумигдаж, УИХ, Засгийн газраас гаргаж буй шийдвэрүүд байгаа онохгүй байгааг шүүмжлэв.

Жагсаалд оролцож буй иргэд "Ямар нэг захиалгаар жагсаалд оролцоогүй. Цахим орчинд тарсан зарыг хараад жагсаалд оролцож байна” гэдгээ хэлж байна.

Тэд “Олон улсын нөхцөл байдлаас шалтгаалж шатахууны хомсдол үүссэнийг ойлгоно. Гэхдээ нөхцөл байдал иймдээ тулсныг хүлээн зөвшөөрч, зөвтгөх боломжгүй. Ганц шатахууны асуудал биш. Эдийн засгийн хүндрэлтэй, хүмүүсийн орлого тасарч байна. Төр үргүй зардлаа багасгах шаардлагатай. Дотоодын нефтийн үйлдвэрээ хурдан ашиглалтад оруулах хэрэгтэй" гэв.