Сэлэнгэ аймгийн 10 сумын нутаг дэвсгэрт хүрэн баавгай 86 удаа үзэгдсэн бүртгэл мэдээлэл ирж, малын хорогдол гарсан тул иргэд, малчдыг сонор сэрэмжтэй байхыг холбогдох байгууллагуудаас анхааруулж байна.

Нөхцөл байдалтай холбогдуулан аймгийн Засаг даргын удирдамжаар шуурхай ажлын хэсэг ажиллаж, дуудлага мэдээллийн дагуу шаардлагатай арга хэмжээг газар дээр нь авч хэрэгжүүлж байна.

Одоогийн байдлаар аймгийн хэмжээнд хүрэн баавгай 10 сумын нутаг дэвсгэрийн 36 нэр бүхий газарт нийт 86 удаа үзэгдсэн тухай бүртгэл мэдээлэл ирсэн бөгөөд 162 толгой мал барьж идсэн тохиолдол бүртгэгджээ.

Үүнтэй холбогдуулан аймгийн Засаг даргын удирдамжийн дагуу Байгаль орчны газар, Онцгой байдлын газар, Тагнуулын газар, Цагдаагийн газар, Мал эмнэлгийн газрыг оролцуулсан шуурхай ажлын хэсэг байгуулан нөхцөл байдалд хяналт тавьж, дуудлага мэдээллийн дагуу газар дээр нь ажиллаж байна.

Ажлын хэсэг нэн шаардлагатай дуудлага мэдээлэл ирсэн Жавхлант, Хүдэр сум болон Бугант тосгонд газар дээр нь ажиллаж, нөхцөл байдлыг үнэлэн, шаардлагатай шуурхай арга хэмжээг авч хэрэгжүүлж байна.

Иймд иргэд, малчид ой, хээрийн бүсэд зорчихдоо сонор сэрэмжтэй байж, ялангуяа өглөө эрт, оройн цагаар ганцаараа зорчихгүй байх, мал сүргээ хараа хяналттай байлгах, хүнс болон малын тэжээлийн үлдэгдэл зэрэг баавгай татахуйц зүйлсийг ил задгай орхихгүй байхыг зөвлөж байна.

Мөн хүрэн баавгайтай таарсан тохиолдолд ойртох, хөөх, үргээх, зураг авахын тулд дагаж очих зэрэг эрсдэлтэй үйлдэл хийхгүйгээр аюулгүй зайд холдож, тухайн байршил болон нөхцөл байдлын талаар холбогдох байгууллагад нэн даруй мэдээлэхийг анхааруулж байна.

Холбогдох байгууллагууд иргэдээс ирсэн дуудлага, мэдээллийг хүлээн авч, нөхцөл байдлыг газар дээр нь шалган, шаардлагатай арга хэмжээг тухай бүр авч ажиллах юм.