/ANADOLU/. Дэлхий даяарх байгалийн хийн эрэлт 2025 онд өмнөх оныхтой харьцуулахад 1.7 хувиар өсөж, 4 их наяд 202 тэрбум шоо метрт хүрсэн нь түүхэнд бүртгэгдээгүй өндөр үзүүлэлт болж байна.  

Энэ бол Олон улсын хийн холбоо /IGU/ ба Snam компанийн хамтран бэлтгэсэн “Дэлхийн хийн тайлан -2026”-д дурдсан тоо юм. Тайланд дурдсанаар, байгалийн хийн эрэлт төдийгүй нийлүүлэлт болон шингэрүүлсэн хийн худалдааны хэмжээ түүхэн дээд үзүүлэлтэд хүрчээ. Тодруулбал, хийн нийлүүлэлт жилийн хугацаанд 52 тэрбум шоо метрээр өсөж, 4 их наяд 147 тэрбум шоо метрт хүрсэн байна.

Мөн нийт эрэлт 69 тэрбум шоо метрээр өссөнөөс Азид 25 тэрбум шоо метрээр, Ойрх Дорнодод 18 тэрбум шоо метрээр, Европт 10 тэрбум шоо метрээр тус тус өсжээ. Эрэлт буурсан цорын ганц бүс нутаг нь далайн орнууд байлаа. Европт 2.3 хувиар өссөн шалтгаан нь оны эхээр хүйтэрсэн, мөн өвлийн улиралд гарган авах салхины эрчим хүчний хэмжээ буурсантай холбоотой.

Үүний зэрэгцээ 2025 онд дэлхий даяарх шингэрүүлсэн хийн худалдааны хэмжээ 43 тэрбум шоо метрээр нэмэгдэж, 580 тэрбумд хүрсэн нь түүхэн дээд үзүүлэлт боллоо. Хэдийгээр Хятадын импорт 10 тэрбум шоо метрээр буурсан боловч тус улс хамгийн том импортлогч хэвээр байна. Европт нийлүүлж буй шингэрүүлсэн хийн хэмжээ 2025 онд 32 тэрбум шоо метрээр өссөн нь Европын эрчим хүчний зах зээлд явагдаж буй бүтцийн өөрчлөлтийг харуулж байгаа бөгөөд европчууд хоолойгоор нийлүүлдэг Оросын хийнээс хамаардаг байдлаа багасгахыг эрмэлзэж буйтай холбоотой.

Тайланд дурдсанаар, 2026 онд дэлхийн даяарх эрэлт 7 тэрбум шоо метрээр буурч магадгүй байгаа нь юуны түрүүнд Ормузын хоолойд үүссэн нөхцөл байдлаас шалтгаалж байгаа юм.