/NHK/ Японы төрийн далбааг гэмтээсэн тохиолдолд шийтгэл хүлээлгэх тухай хууль өчигдрөөс /2026.08.13/ хүчин төгөлдөр болж байна.
Хуулийн төслийг эрх баригч Либерал Ардчилсан нам, Японы Шинэчлэлийн намын эвсэл болон Ардын Ардчилсан нам ба Сансэйто намууд хамтран өргөн барьжээ. Парламентын гишүүд хуулийг өнгөрсөн долоодугаар сард баталсан.
Хуульд зааснаар, Японы төрийн далбаа гэж нийгэмд хүлээн зөвшөөрөгдсөн объект мөн. Далбааг олон нийтийн өмнө гэмтээх, салгах эсвэл гутаан доромжлох байдлаар таагүй мэдрэмж, дургүйцэл төрүүлэх үйлдэлд хоёр жил хүртэлх хугацаагаар хорих ял оноох эсвэл 200,000 иен (ойролцоогоор 1,250 ам.доллар) хүртэлх мөнгөн торгууль ногдуулна.
Мөн тодорхой нэг үйлдлийн төлөө шийтгэл ногдуулахдаа тухайн үйлдэл ба түүнийг тойрсон нөхцөл байдал болон бусад хүчин зүйлийг бодитойгоор харгалзан үзнэ гэж заажээ.
Хуулийг хэрэглэхдээ хүмүүсийн Үндсэн хуулиар баталгаажсан эрх чөлөө, түүний дотор үг хэлэх эрхийг шударга бус байдлаар зөрчихгүй байхыг анхаарах шаардлагатай гэж хуульд нэмж заасан байна.
Парламентын хэлэлцүүлгийн үеэр зарим депутат "шийтгэл хүлээлгэх үйлдлийн цар хүрээ тодорхойгүй" гэжээ. Хууль зүйн яамны зүгээс, хуулийн зорилго ба хамаарах үйлдлүүдийн талаар олон нийтэд мэдээлэл өгч, хуулийг оновчтой байдлаар хэрэгжүүлж ажиллахаа мэдэгджээ.
