Улсын хэмжээнд шатахууны нөөц хомсдсон тул энэ шөнө 00.00 цагаас эхлэн авто машины дугаарын тэгш, сондгойгоор олгохдоо 50 мянган төгрөгөөр хязгаарлахаар шийдвэрлэжээ.

Олон оронд хэрэгжүүлж буй энэ зохицуулалт нь нөөцөө зөв, тэгш хуваарилах, иргэдийг ШТС-ын гадаа хүлээлгэж цагийг нь үрэхгүй, орон нутгийнханд боломж олгох арга юм. Энэ хязгаарлалт нь наймдугаар сарын 15 хүртэл үргэлжилнэ гэж АҮЭБЯ мэдээлэв. 

Дэлхий даяар нефть, шатахуун, бэлэн бүтээгдэхүүний тээврийн нөхцөл байдал хүндэрч, газрын тосны хямрал болж буй нь манай улсад ч нөлөөлж байгааг АҮЭБ-ийн сайд Г.Дамдинням онцлоод, “ОХУ-ын газрын тосны үйлдвэрт зөвхөн 7 дугаар сард 190 удаа дроны довтолгоо ирсэн нь өнгөрсөн оныхоос 10 дахин нэмэгдсэн. Довтолгооны улмаас газрын тос боловсруулах 16 үйлдвэр ажиллагаагүй болж, хүчин чадал нь 45 хувь хүртэл багасаад байгаа”-г тодотгосон юм. 

Онгоцны 1000 тонн түлш Замын-Үүд боомтод өнөөдөр бууж байгаа бол ОХУ-аас шатахууны ачилтыг нэмэхэд анхаарч, БНСУ-ын яам, үйлдвэрийн төлөөлөлтэй уулзан, БНХАУ-аас эхний ээлжинд 2000 тонн дизель, 6000 тн АИ92 ачуулаад байна.

Энэ бэрхшээлтэй цаг үеийн хамтдаа туулахыг хүсэж байгаагаа сайд Г.Дамдинням учирлаад, “Аль болох иргэдэд хүндрэл учруулахгүй асуудлыг шийдэхийн төлөө, нөөцөө зөв зохистой хуваарилж байна. Намрын ургац хураалтын үед 7-10 мянган тн дизель түлшний хэрэгцээ үүсдгийг нөөцөлж байгаа. Бид хангамжаа таслахгүй, үнээ хэт өсгөхгүйг зорьж байна” гэлээ.  

Манай улсын газрын тосны бүтээгдэхүүний хэрэгцээ жилд 14 хувиар нэмэгддэг. Өнгөрсөн онд 3 сая тонн газрын тосны бүтээгдэхүүн хэрэглэсэн бол энэ оны эхний 7 сард 1 сая 783 тонн хэрэглэсэн байна. Хэрэглээний 30 хувь нь АИ92 бензин, 63 хувийг дизель түлш юм. Нийт хэрэглээний 80 хувийг төв, говийн бүс эзэлдэг байна.