Хүний эрхийн Үндэсний Комисс нь жил бүр Үндэсний их баяр наадам, бүсийн наадам, үсэргээ, сунгаа зэрэг хурдан морины уралдаанд оролцож буй уралдаанч хүүхдийн эрхийн хэрэгжилтэд хяналт, ажиглалт хийж, илэрсэн зөрчлийг арилгуулах, цаашид хүүхдийн эрхийг хангах арга хэмжээг хэрэгжүүлэн ажилладаг.

Энэ жилийн Үндэсний их баяр наадам болон бүсийн хурдан морины уралдааны үеэр мөн Комиссоос хяналт тавин ажиллах юм.

Энэ хүрээнд Комиссын Гомдол, хяналт шалгалтын хэлтсийн дарга Г.Ууганбаатараар ахлуулсан ажлын хэсэг Үндэсний их баяр наадмын хурдан морины уралдаанд оролцож буй уралдаанч хүүхдийн эрхийн хэрэгжилтэд хяналт, ажиглалт хийнэ. 

Түүнчлэн 21 аймаг дахь Хүний эрхийн Үндэсний Комиссын орон нутаг дахь референт болон Комиссоос томилогдсон ажлын хэсгийн гишүүд орон нутагт зохион байгуулагдах хурдан морины уралдаанд хяналт тавин ажиллана.

Хяналт, ажиглалтын хүрээнд уралдаанч хүүхдийн аюулгүй байдлыг хангах, хамгаалах, холбогдох хууль тогтоомж, стандартын хэрэгжилтийг шалгах, чиг үүрэг бүхий төрийн захиргааны болон хууль сахиулах байгууллагуудын үйл ажиллагаанд ажиглалт хийх, шаардлагатай тохиолдолд тэмдэглэл, гэрэл зураг, дүрс бичлэгээр баримтжуулах юм.

Тухайлбал: Үндэсний их баяр наадмын тухай хуульд заасан уралдаанч хүүхдийн насны доод хязгаарыг мөрдөж байгаа эсэх;

Уралдаанч хүүхэд хамгаалалтын хувцас, хамгаалах хэрэгсэл болон морины тоног хэрэгслийн стандарт шаардлагад нийцсэн хувцас, хэрэглэлээр бүрэн хангагдсан эсэх;

Уралдаанч хүүхэд бусдын аюулгүй байдалд эрсдэл учруулж болзошгүй эд зүйлс (1 метрээс урт ташуур, тод өнгийн бөс даавуу, гялгар уут, холбоо барих станц, гар утас, хурц иртэй болон хатуу биет зүйл) авч явж байгаа эсэх;

Шаардлагатай тохиолдолд хурдан морины уралдаантай холбоотой баримт бичигтэй танилцах; Уралдаанч хүүхдийн бүртгэлтэй холбоотой хүндрэл, бэрхшээлийн талаарх мэдээллийг тухай бүр авах; Уралдаанч хүүхдийг гэнэтийн ослын даатгалд хамруулсан эсэхийг шалгах;

Уралдаанч хүүхдийн асран хамгаалагч болон уяач хооронд гэрээ байгуулсан эсэх талаар мэдээлэл гаргуулан авах;

Уралдааны үеийн осол, эрсдэлээс урьдчилан сэргийлэх, унаж бэртсэн хүүхдэд яаралтай тусламж үзүүлэх бэлэн байдлыг шалгах;

Хяналт, ажиглалтын дүнд илэрсэн зөрчил, дутагдлыг арилгуулах зорилгоор холбогдох байгууллагуудад хүүхдийн эрхийн зөрчлөөс урьдчилан сэргийлэх, хүүхдийн эрхийг хангах чиглэлээр шаардлагатай арга хэмжээг авч хэрэгжүүлэх чиглэлээр Комиссын гишүүний шаардлага хүргүүлж ажиллах юм.

Энэ жил 07 дугаар 24-26-ны өдөр Сүхбаатар аймагт Зүүн бүс, Дундговь аймагт Говийн бүс, Завхан аймагт Баруун бүсийн хурдан морины уралдаан, 2026.07.23-25-ны өдөр Орхон аймагт зохион байгуулагдах Хангайн бүсийн хурдан морины уралдаанд Комиссоос томилогдсон ажлын хэсэг уралдаанч хүүхдийн эрхийн хэрэгжилтэд хяналт тавин ажиллана. 

Баяр наадмын өмнө Комиссоос Хүүхэд, гэр бүлийн хөгжил, хамгааллын ерөнхий газар, Монголын морин спорт, уяачдын холбоо, Монголын үндэсний морин уралдаан, уяачдын холбоо, Нийслэл, 21 аймгийн Засаг дарга нарт уралдаанч хүүхдийн эрхийн асуудалд анхаарал хандуулж, хурдан морины уралдаан, сунгаа, үсэргээний үеэр хүүхдийн аюулгүй байдлыг хангах, хүүхдийн эрх зөрчигдөхөөс урьдчилан сэргийлэхэд чиглэсэн зөвлөмжийг хүргүүлсэн.

Хүний эрхийн Үндэсний Комиссоос эцэг, эх, асран хамгаалагч, уяач, уралдаан зохион байгуулагч болон холбогдох төрийн байгууллагууд, нийслэл, аймгийн Засаг дарга нар уралдаанч хүүхдийн эрх, аюулгүй байдлыг нэн тэргүүнд тавьж, хууль тогтоомж, стандартын шаардлагыг чанд мөрдөн ажиллахыг анхааруулж байна.