ХБНГУ-ын Байгаль орчин, уур амьсгалын өөрчлөлт, байгаль хамгаалал, цөмийн аюулгүй байдлын яам болон Европын Холбооноос хамтран санхүүжүүлдэг "IKI JET" төслөөс хэрэгжүүлж буй техникийн туслалцааны ажлын хүрээнд Налайх дүүргийн 7-р хороонд байрлах “Нарны Эрч“ өрхийн эрүүл мэндийн төвийн дээвэр дээр 30 кВт-ын хүчин чадалтай, 20 кВт цаг багтаамжтай нарны цахилгаан үүсгүүр (НЦҮ)-ийн хосолмол системийг амжилттай суурилуулж, хүлээлгэн өглөө.

Тус эрүүл мэндийн төв нь 3,000 гаруй өрхийн 11,000 гаруй иргэдэд эмнэлгийн тусламж үйлчилгээ үзүүлдэг бөгөөд урьд нь цахилгааны хүчдэлийн уналтаас шалтгаалан үйл ажиллагаа нь тасалдах хүндрэлтэй тулгардаг байсан юм. Налайх дүүргийн Засаг Даргын Тамгын Газрын хүсэлтийн дагуу хэрэгжүүлсэн уг тогтвортой эрчим хүчний шийдэл нь эмнэлгийн тусламж үйлчилгээг тасралтгүй, найдвартай цахилгаанаар хангах нөхцөлийг бүрдүүллээ.

Уг системийг албан ёсоор хүлээлгэн өгөх арга хэмжээнд Налайх дүүргийн Засаг дарга Д.Наянбаяр, Налайх дүүргийн Иргэдийн төлөөлөгчдийн хурлын дарга Н.Мандуул, Германы олон улсын хамтын ажиллагааны нийгэмлэгийн (GIZ) Эрчим хүчний төслүүдийн удирдагч Йонас Реннер болон холбогдох байгууллагуудын төлөөлөл оролцлоо.

Уг төслийг ХБНГУ-ын Байгаль орчин, байгаль хамгаалал, цөмийн аюулгүй байдлын яамны Олон улсын уур амьсгалын санаачилга (IKI) болон Европын Холбоо хамтран санхүүжүүлж байна.