Тулгар төрийн 2235 жил, Их Монгол Улс байгуулагдсаны 820 жил, Үндэсний эрх чөлөө, тусгаар тогтнолоо сэргээн мандуулсны 115 жил, Ардын хувьсгалын 105 жилийн ой, Британи дахь Монголчуудын “Лондон наадам-2026" Вимблдоны зүлэг ногоон дэнж дээр 7 дугаар сарын 5-нд өргөн дэлгэр зохион байгуулав.
Баяр наадмыг нээж Монгол Улсаас ИБУИНХУ-д суугаа Элчин сайд Б.Мөнхжин үг хэлж, Британид үйл ажиллагаа явуулж буй Монголчуудын үүсэл санаачилгын байгууллага, холбоод, клубийн төлөөллүүд хүндэтгэлийн жагсаалд оролцон Монгол Улсын Төрийн далбааг цэнгүүлэн залснаар нээлт эхлэв. Энэ үеэр морин хуурын эгшиг, уртын дуу, бий биелгээ, цам бүжиг, урилгаар комедиан Төөгөө, уран бүтээлч Давайдашаа нар мэндчилгээ дэвшүүлж хурсан наадамчдын сэтгэлийг баясгав.
Үндэсний бөхийн барилдаанд нийт 32 бөх барилдсанаас Төв аймгийн Баян сумын харьяат сумын заан Б.Батбилиг 3 дахь удаагаа түрүүлж шилжин явах цомын эзэн болсон бол Төв аймгийн Борнуур сумын харьяат сумын заан Ц.Баасанцэрэн анх удаагаа үзүүрлэв. Их шөвөгт Говь-Алтай аймгийн Дэлгэрэх сумын харьяат сумын заан Д.Баасандорж, Булган аймгийн Бугат сумын харьяат Лондоны начин Д.Очирбат нар үлдэн барилдлаа.
Мөн “Лондон наадам-2026” сурын харвааг “Есүнгэ Мэргэн” Англи дахь сурын спорт сонирхогчдын клубээс сурын харвааны тэмцээнийг 2026 оны 6 дугаар сарын 14-нд Кембриж хотын Чөрчилл коллежийн талбайд зохион байгуулсан бөгөөд эрэгтэй насанд хүрэгчдийн харваанд 1 дүгээр байрт Б.Гарьд (2024, 2025, 2026), 2 дугаар байрт Т. Баянжаргал, 3 дугаар байрт Б. Жозеф, эмэгтэй насанд хүрэгчдийн харваанд 1 дүгээр байрт Ж. Батчимэг, 2 дугаар байрт Г. Анужин, Ч.Ариунгэрэл, 3 дугаар байрт Сачираа орж, нар тус тус байр эзэлж алт, мөнгө, хүрэл медаль, өргөмжлөл, шилжин явах цомоор шагнуулсан юм.
Наадмын үеэр Британи дахь Монголчуудын холбоод, клуб, хувь хүмүүсийн санаачилга, дэмжлэгтэй уламжлал болсон нас насны хүүхдүүдийн оролцсон хурдан морьдын уралдааны үлгэрлэл арга хэмжээ, Дээлтэй Монгол наадам-сайхан Монгол хувцастан уралдаан, Үндэсний шагайн харвааны цуваа харвааны тэмцээн, олс таталтын тэмцээн болон наадмын азтанг шалгаруулав.
“Лондон наадам 2026” баяр наадмын Ерөнхий продюсер, найруулагчаар СТА М.Мөнхзоригт ажилласныг Монгол Улсаас Их Британи, Умард Ирландын Нэгдсэн Хаант Улсад суугаа ЭСЯ мэдээлэв.
