Налайх дүүрэгт улсын төсвийн хөрөнгө оруулалтаар 79 МВт-ын хүчин чадалтай шинэ дулааны станц байгуулах ажил өнөөдөр /2026.06.29/ эхэлжээ.
Налайх дүүргийн 3-р хорооны нутагт баригдах шинэ дулааны станц нь гурван үе шаттай хэрэгжих бөгөөд нийт 256МВт-ын хүчин чадалтай, 7,900 өрх, 13,000-19,000 айлын орон сууцны барилгыг чанартай төвлөрсөн дулаан хангамжаар хангаж, дүүргийн нийгэм, эдийн засгийн тогтвортой хөгжлийг хангана.
Төслийн хүрээнд 1.4км дулаан дамжуулах шугам сүлжээг шинээр барьж, 0.5км шугам сүлжээг өргөтгөн шинэчилж, найдвартай, тасралтгүй дулаан хангамжтай болсноор иргэдийн тав тух, эрүүл, аюулгүй амьдрах орчин бүрдэж, гэр хорооллын айл өрхийг ч дулаанаар хангах боломжтой. Мөн удахгүй 110/35 кВ-ын өндөр хүчин чадал бүхий цахилгааны дэд станц барих ажлыг эхлүүлэхээр төлөвлөсөн байна.
Нээлтийн ажиллагаанд оролцсон УИХ, Засгийн газрын гишүүн, ХЗДХ-ийн сайд С.Амарсайхан "Налайх дүүргийг Бүсчилсэн хөгжлийн бодлогын хүрээнд аж үйлдвэр, аялал жуулчлалаар тэргүүлсэн ХОТ болгон хөгжүүлэх шинэ хотын ерөнхий төлөвлөлтийг хийж дуусгасан. Налайх ногоон орчинтой, хүндээ ээлтэй, нэгдсэн стандарттай хот болж Улаанбаатар хотын хэт төвлөрлийг сааруулна. Шинэ хотын эхлэл болох 1000 айлын орон сууц, үйлдвэр технологийн парк, дулааны станц зэрэг бүтээн байгуулалтууд Налайх дүүрэгт ид өрнөж байна.
Налайх дүүрэг бие даасан хот болон хөгжихөд орон нутгийн засаг захиргаа, ард иргэд та бүхний минь хамтын хүч, хичээл зүтгэл, сэтгэл гарган оролцож, дэмжихийг хүсье" гэжээ.
