Үндэсний их баяр наадмыг зохион байгуулах хорооны ээлжит хуралдаан энэ сарын 16-нд болж, наадмын зохион байгуулалттай холбоотой хэд хэдэн чухал шинэчлэлийг хэлэлцжээ. Шадар сайд Н.Номтойбаяр бөхийн барилдааныг допинггүй цэвэр явуулахын тулд бүхий л боломжийг дайчлахыг үүрэг болгосон байна.

Тухайлбал, Монголд допинг илрүүлэх тусгай лаборатори, тоног төхөөрөмж байхгүйгээс шалтгаалан шинжилгээний дээжийг гадаад руу илгээж, хариу нь хоёр долоо хоногийн дараа ирдэг одоогийн тогтолцоог шүүмжилж, "шинжилгээний хариу удсанаас Ерөнхийлөгчийн зарлиг гарч цол олгосны дараа маргаан үүсэх, цол, бай шагналыг хураах зэргээр иргэдийг бухимдуулдаг. Тиймээс допингийн үр дүнг наадмын үеэр газар дээр нь шууд гаргадаг болох шаардлагатай. Мөн наадмын нээлт, хаалтын тасалбарын борлуулалтад ч шинэ дүрэм үйлчилнэ" гэж мэдэгдсэн.

Энэ жил баяр наадмын тасалбарыг ямар нэгэн давуу эрхгүйгээр 100 хувь иргэдэд худалдаалахаар төлөвлөж байгаа бөгөөд УИХ-ын гишүүд, сайд, дарга нарт элдэв тусгай зөвшөөрөл олгохгүй, "Төв цэнгэлдэхийн суудлыг бүрэн борлуулж, урилгаар суудал хадгалдаг жишгийг хална" гэв.