ХБНГУ-ын Ханновер хотод болсон гал түймэртэй тэмцэх, аврах ажиллагаа, иргэний хамгаалалт, аюулгүй байдлын салбарын дэлхийн хамгийн том, нэр хүндтэй “INTERSCHUTZ 2026” олон улсын үзэсгэлэнд Монгол Улсад нийлүүлэх гал унтраах тусгай зориулалтын автомеханик шатны автомашиныг танилцууллаа.

ОБЕГ-ын мэдээлснээр, Бүгд Найрамдах Франц Улсад Монгол Улсын цаг уурын нөхцөл, алба хаагчдын үүрэг гүйцэтгэлийн онцлогт нийцүүлэн захиалгаар үйлдвэрлэж байгаа тус автомашиныг хоёр улсын Засгийн газар хооронд байгуулсан Санхүүгийн хэлэлцээрийн хүрээнд хэрэгжүүлж буй “Онцгой байдлын байгууллагад гал түймэр унтраах тусгай зориулалтын автомашин нийлүүлэх төсөл”-ийн хоёрдугаар шатны хүрээнд нийлүүлэх юм.

Үзэсгэлэнд дэлхийн зах зээлд тэргүүлэгч үйлдвэрлэгчдийн дэвшилтэт техник, тоног төхөөрөмжийг танилцуулсан бөгөөд Монгол Улсад ашиглагдаж буй гал унтраах тусгай зориулалтын автомашинууд ч багтжээ. Тухайлбал, жилд 2000 гаруй автомашин үйлдвэрлэж, дэлхийн 100 гаруй улсад нийлүүлдэг Австри Улсын “Rosenbauer”, Зүүн Европын тэргүүлэгч үйлдвэрлэгч Польш Улсын “Stolarczyk”, Франц Улсын гал унтраах, аврах ажиллагааны техник, тоног төхөөрөмжийн салбарын тэргүүлэгч “Десотел” компанийн бүтээгдэхүүнүүдийг дэлгэн үзүүлжээ.

Энэ удаагийн үзэсгэлэнд гал унтраах болон аврах ажиллагааны автомашин, хувийн хамгаалах тусгай хувцас, багаж хэрэгсэл, нисгэгчгүй нисэх төхөөрөмж, өөрөө явагч техник, хиймэл оюунд суурилсан шийдэл зэрэг салбарын хөгжлийн чиг хандлагыг тодорхойлох дэвшилтэт технологийг танилцуулсан 1600 гаруй үйлдвэрлэгч оролцож, дэлхийн улс орнуудын 140 мянга орчим зочин, төлөөлөгч хүрэлцэн иржээ.

1961 оноос хойш зохион байгуулж ирсэн “INTERSCHUTZ” үзэсгэлэн гал түймэртэй тэмцэх, аврах ажиллагаа, иргэний хамгаалалт, аюулгүй байдлын салбарын инновац, туршлага солилцооны хамгийн том олон улсын талбар юм.