Монгол Улс “Дэлхийн адууны өдөр”-ийг санаачлагч улс орнуудыг хамруулан 2026 оны долоодугаар сарын 11-13-нд өргөн хүрээнд тэмдэглэхээр бэлтгэж байна.

Адууны соёл, өв уламжлал, нүүдлийн иргэншлийн үнэт өвийг олон улсад сурталчлан таниулах энэхүү өдрөөр 56 орны зочид, төлөөлөгчид Монгол Улсад хуран чуулж, адууны өв соёлыг сурталчлан ёслол хүндэтгэл, эрдэм шинжилгээ, соёл, урлаг, спортын цуврал арга хэмжээнүүд, 10 мянган морьтны жагсаалыг зохион байгуулж оролцох юм.

“Дэлхийн адууны өдөр”-ийн үндсэн арга хэмжээнүүдийг долоодугаар сарын 13-нд Улаанбаатар хотын ойролцоох Хүй долоо худагт зохион байгуулах бөгөөд шаардлагатай эрчим хүчний хангамж, инженерийн дэд бүтэц, тохижилтын ажлыг гүйцэтгэж байна.

НҮБ-ын Ерөнхий Ассамблейн 79 дүгээр чуулганы 2025 оны зургаадугаар сарын 3-ны өдрийн Бүгд хуралдаанаар Монгол Улсын Ерөнхийлөгч Ухнаагийн Хүрэлсүхийн санаачилсан “Дэлхийн адууны өдрийн тухай” тогтоолыг хэлэлцэн баталсан. Уг тогтоолд 56 орон хамтран зохиогчоор нэгдсэн бөгөөд хүн төрөлхтний өнгөрсөн, өнөөгийн ахуй амьдралд адууны гүйцэтгэсэн үүрэг, хувь нэмрийг тодотгон, адууны өв соёл болон бэлчээр, нүүдлийн аж ахуйн хэв маягийг хамгаалж, хадгалахыг уриалж жил бүрийн 7 дугаар сарын 11-нд Дэлхийн адууны өдрийг тэмдэглэж байхаар болсон юм.