Дорноговь аймаг иргэдээ орон сууцжуулах хөтөлбөрийг 2016 оноос хойш сүүлийн 9 жилийн хугацаанд хэрэгжүүлж, түрээслээд өмчлөх болон ипотекийн зээлээр 2512 айлыг орон сууцаар хангажээ.
Үүний 329 нь түрээсийн орон сууцанд хамрагджээ. Энэ онд нэмэлтээр 288 айлыг түрээсийн орон сууцанд хамруулахаар төлөвлөсөн байна. Түрээслээд өмчлөх хөтөлбөрийн хүрээнд баригдсан орон сууцны нэг ам метрийн үнэ 1.9-2.4 сая төгрөгийн хооронд хэлбэлзэж байгаа юм. Түрээсийн орон сууцны эх үүсвэрийг аймгийн орон нутгийн хөгжлийн сангаас гаргаж, одоогийн байдлаар нийт 36.4 тэрбум төгрөгийн хөрөнгө оруулалт хийгээд байна.
Түрээсийн орон сууцанд хамрагдсан айлууд 5-10 жилийн хугацаанд сар бүр төлбөр төлөх бөгөөд энэ хугацаанд хүү, алданги, ханшийн зөрүү тооцогдохгүй. Байрны төлбөрөө бүрэн төлж дуусган, гэрчилгээ авсны дараа татварын хуулийн дагуу НӨАТ-ын буцаан олголт, татварын хөнгөлөлт, чөлөөлөлтөд хамрагдах эрх үүсэх юм.
