Газар зохион байгуулалт, геодези, зураг зүйн ерөнхий газар болон БНСУ-ын Олон Улсын Хамтын Ажиллагааны Агентлаг (KOICA) хамтран хэрэгжүүлэх “Хаягийн мэдээллийн системийг шинэчлэх замаар Монгол Улсын цахим төрийн удирдлагыг бэхжүүлэх төсөл”-ийн хэлэлцээрт албан ёсоор гарын үсэг зурлаа.

Хэлэлцээрт Газар зохион байгуулалт, геодези, зураг зүйн ерөнхий газрын дарга А.Энхманлай болон албаны хүмүүс, БНСУ-ын Олон Улсын Хамтын Ажиллагааны Агентлагийн Монгол дахь Суурин төлөөлөгч Жу Хэн Лан, орлогч дарга Сө Хён Жэ нар оролцов.

Монгол Улс, БНСУ-ын хамтын ажиллагааны хүрээнд 2024 онд Монгол Улсын Засгийн газар, БНСУ-ын Дотоод хэрэг, аюулгүй байдлын яам, Газар зохион байгуулалт, геодези, зураг зүйн ерөнхий газар болон БНСУ-ын Газар, геоматик (LX) корпорац хооронд “Монгол Улсын хаягийн мэдээллийн системийг шинэчлэх төсөл”-ийг хэрэгжүүлэх талаар харилцан ойлголцлын санамж бичиг байгуулсан нь энэхүү төслийн эхлэл болсон юм.

Тус төсөл Монгол Улсын хаягийн мэдээллийн системийг олон улсын жишигт нийцүүлэн шинэчлэх, төрийн цахим үйлчилгээний чанар, хүртээмжийг сайжруулах, хаягийн мэдээлэлд суурилсан нэгдсэн удирдлагын тогтолцоог бэхжүүлэх зорилготой юм.

Төслийн хүрээнд Улаанбаатар хотын сонгогдсон бүсэд дрон технологи ашиглан газар ашиглалтын мэдээллийн санг хөгжүүлэх, навигацын системийн мэдээллийг боловсруулах, хаягийн мэдээллийн удирдлагын системийг шинэчлэх, иргэдэд зориулсан цахим үйлчилгээний шийдлийг хөгжүүлэх ажлыг үе шаттай хэрэгжүүлэх юм.

Мөн сервер, дрон, GNSS хүлээн авагч, дата хадгалах систем зэрэг орчин үеийн техник, тоног төхөөрөмжийг нийлүүлэхээс гадна албан хаагчдыг чадавхжуулах сургалт, мэргэшүүлэх хөтөлбөрийг хэрэгжүүлэхээр төлөвлөжээ.

Гарын үсэг зурах үеэр талууд энэхүү хамтын ажиллагаа нь Монгол Улсын цахим шилжилтийг эрчимжүүлэх, хаягийн мэдээллийн нэгдсэн тогтолцоог боловсронгуй болгох, төрийн үйлчилгээг иргэдэд илүү хүртээмжтэй, шуурхай хүргэхэд чухал хувь нэмэр оруулна гэдгийг онцолсон юм.