Ах, дүү найрамдалт харилцаатай Дархан, Улаан Үд хотын хамтын ажиллагааны 59 жил энэ онд тохиож байна. Ирэх онд тохиох 60 жилийн ойг угтан Дархан-Уул аймгийн ЗДТГ-ын Нийгмийн бодлогын хэлтсийн дарга Н.Цасчихэр, ОХУ-ын Буриад улсын Улаан Үд хотын захиргааны Нийгэм, залуучуудын бодлогын хорооны дарга И.В Ковалева нар хамтын ажиллагааны санамж бичиг байгуулж гарын үсэг зурлаа.

Хамтын ажиллагааны үндсэн чиглэлүүдээс дурдвал ЕБС-иудын шууд харилцаа, холбоог дэмжинэ. Үүнд хэл заслын багш болон СӨББ-ын хүүхэд, багачуудад зориулсан сургалт зохион байгуулах, соёл, урлагийн салбарт үндэсний түүх, уламжлал соёлын өвийг сурталчлахад чиглэсэн соёл, урлагийн арга хэмжээг зохион байгуулна.

Мөн гэр бүлийг хамгаалах болох хөгжүүлэх чиглэлээр зуны зусланд хүүхэд солилцооны хөтөлбөрүүдийг дэмжих, тэдний чөлөөт цагийг үр дүнтэй өнгөрүүлэхэд хамтран ажиллах юм.

Тухайлбал залуучуудыг хотуудын нийгэм, эдийн засаг, соёлын амьдралд оролцуулах, сайн дурын үйл ажиллагааг хөгжүүлэх, тэдний санаачилгыг дэмжин ажиллахаар тусгажээ.

Энэхүү санамж бичиг нь таван жилийн хугацаанд хэрэгжих бөгөөд дээр чиглэлүүдээр хамтын ажиллагаа явуулж хоёр хотын ах, дүүгийн харилцааг шинэ түвшинд гаргахад залуусын оролцоо чухал гэж онцолж байна.