Номхон далайн бүс нутагт Зэвсэгт хүчний ахлагч нарын дунд “Pacific Land Forces Team Readiness Challenge” олон улсын тэмцээнийг анх удаа зохион байгуулж, Монголын цэргүүд дэд байрт шалгарчээ.
Тодруулбал, АНУ-ын Хавайн Оаху аралд болсон энэхүү тэмцээнд Монгол, АНУ, Канад, Их Британи, Малайз, Фижи, Шинэ Зеланд, Филиппин, Сингапур гэсэн есөн орны цэргийн алба хаагчид оролцсон бөгөөд бие бялдар, сэтгэл зүйн хамгийн хүнд сорилтуудыг даван туулжээ. Тэмцээний нийлбэр дүнгээр Их Британийн баг тэргүүлсэн бол Монголын зэвсэгт хүчний алба хаагчид удаалсныг АНУ-ын Номхон далайн Хуурай замын цэргийн командлалын цахим хуудаснаа онцолсон байна.
Монгол цэргүүд дэлхийн найман орны шилдэг алба хаагчидтай өрсөлдөн дэд байрт шалгараад зогсохгүй бүлгийн ахлагчаар үүрэг гүйцэтгэсэн рэйнжер, сургагч ахлагч А.Мөнгөншагай тэмцээний “Шилдэг тасгийн захирагч”-аар тодров. Монголын багийн бүрэлдэхүүнд сургагч ахлагч А.Мөнгөншагай, ахлах ахлагч В.Балдорж, Л.Баатар, Г.Багабанди, Ц.Зоригт, ахлагч М.Гандаваа багтаж, эх орныхоо нэрийг мандуулсан байна.
Тэмцээн зохион байгуулагчид шагнал гардуулах үеэр монголчуудын төрөлхийн дайчин чанарыг онцлон дурдаж, монгол цэргүүдийн багийн ажиллагаа хамгийн супер байсныг цохон тэмдэглэжээ.
