Төрийн тахилгатай Их Богд хайрхан уулын тэнгэрийг тайх ёслол 6 дугаар сарын 3-нд Баянхонгор аймгийн Богд сумын Хориулт хэмээх газар болно.
Монгол Улсын Ерөнхийлөгчийн тухай хуулийн 9 дүгээр зүйлийн 1 дэх хэсэг, Монгол Улсын Ерөнхийлөгчийн 2026 оны 16 дугаар зарлигаар батлагдсан "Төрийн тахилгатай уул овооны тэнгэр, гол мөрөн, нуурын лусыг тахих тахилгын ёслолын журам”-ын хүрээнд ёслолыг үйлдэхээр болсон юм. Ёслолыг Монгол Улсын Ерөнхийлөгчийн Тамгын газар, Баянхонгор аймгийн Иргэдийн Төлөөлөгчдийн хурал, Баянхонгор аймгийн Засаг даргын Тамгын газар хамтран зохион байгуулна.
Энэхүү ажлын хүрээнд Баянхонгор аймгийн ИТХ-ын ээлжит хурлаар шийдвэр гарган, аймгийн Засаг даргын захирамжаар холбогдох ажлын багууд байгуулж, чиг үүргийг нь тодорхойлон бэлтгэл ажлыг эхлүүлээд байна.
Ажлын багийг аймгийн Засаг даргын зөвлөх Э.Ганзориг ахалж, нийт найман дэд ажлын баг байгуулан зохион байгуулалт, бэлтгэл ажлыг шат дараатайгаар ханган ажиллаж байна.
Баталсан төлөвлөгөөний дагуу уулыг тахих өдөр зан үйлийн ёслол, шашин соёлын үйл ажиллагаа болон бэсрэг наадмыг тус тус зохион байгуулна.
Их Богд хайрхан уулын төрийн тахилгад Ламын гэгээн, Гачэн гэгээн, Гүшри хувилгаан зэрэг хутагт оролцохын зэрэгцээ Гандантэгчэнлин хийд болон Монголын олон сүм хийдийн лам хуврагууд хүрэлцэн ирж, сүсэгтэн олонд зориулан шашин номын зан үйл үйлдэх юм.
