Аймгийн хэмжээнд 2026 оны нэгдүгээр улирлын байдлаар 39 байршилд 4886 айлын орон сууцны барилга барьж байна. Шинээр барьж буй орон сууцны нэг метр квадратын хамгийн бага үнэ 3 сая төгрөг байна.
Дундаж үнэ 3.5-4.5 сая төгрөгийн хооронд хэлбэлзэж байгаа бөгөөд байршил, барилгын хийц, ашигласан материалаас шалтгаалан үнэ нэмэгдэж байна.
2025 онд 19 байршилд нийт 1317 айлын орон сууцны барилга ашиглалтад орсон бөгөөд 100 хувийн борлуулалт хийж амжаагүй байна.
Ихэвчлэн ес болон 16 давхар барилгууд барьж байна. Аймгийн удирдах ажилтны дөрөвдүгээр сарын хуралдаанаар шинээр 16 давхар барилгын зөвшөөрөл олгохыг түр хугацаагаар хориглосон.
Учир нь хүн амны төвлөрөл нэмэгдэж, авто зогсоол, сургууль, цэцэрлэгийн асуудлыг шийдвэрлэхэд барилгын компаниуд хойрго хандаж байгаа тул ийнхүү шийдвэр гаргажээ. Харин тухайн шийдвэр гаргахаас өмнө 16 давхар барилга барих зөвшөөрлөө авсан тохиолдолд уг хориг хамаарахгүй юм.
Мөн тухайн барилга угсралтын компани барилгын ажлынхаа 50 хувийг гүйцэтгээгүй тохиолдолд иргэдээс захиалга авахгүй байх шаардлага тавьж байна. Учир нь зөвхөн суурийн ажлыг эхлүүлсэн хэр нь иргэдээс урьдчилгаа төлбөр авч, барилга нь гүйцэд баригдаагүй, улмаар хуулийн байгууллагад шалгагдаж буй 2–3 тохиолдол гарсан байна.
