Аймгийн Сэтгэл зүйчдийн холбоо, Монголын спортын сэтгэл судлаачдын холбоотой хамтран орон нутагт анхны спортын сэтгэл зүйчдийг бэлтгэх модуль-1 сургалтыг гуравдугаар сарын 28,29-ний өдөр зохион байгууллаа.

Сургалтаар тамирчны дотоод сэдлийг зөв хөгжүүлж, тогтвортой хадгалахад чиглэсэн “Сэдэлжүүлэх ярилцлага”-ын арга зүй, сэтгэл хөдлөлөө удирдах чадвар спортын гүйцэтгэлд хэрхэн шууд нөлөөлдөг талаарх судалгаанд суурилсан ойлголтуудын талаар хичээл орсон байна.

Мөн амжилтын үндэс болдог зорилгоо зөв тодорхойлох, төлөвлөх суурь ур чадварын талаар дэлгэрэнгүй мэдээлэл өгч, практик дасгал ажиллуулан арга зүйг эзэмшүүлжээ.

Хамтын ажиллагааны санамж бичигт гарын үсэг зурж, цаашид Дархан-Уул аймагт спортын сэтгэл зүйн салбарыг хөгжүүлэх, спорт болон сэтгэл зүйн боловсролоор дамжуулан өсвөр үеийнхний сэтгэл зүйн тулгамдсан асуудлуудад дэмжлэг үзүүлэх төсөл, хөтөлбөрүүдийг хэрэгжүүлэхээр болсон талаар аймгийн Сэтгэл зүйчдийн холбооны тэргүүн М.Сарнай онцоллоо.

Мөн аймгийн Сэтгэл зүйчдийн холбооноос "Сэтгэл зүйн зөвлөгөөний үндсэн техник, зарчим, ёс зүй, бүлгийн зөвлөгөөний ур чадвар, үйлчлүүлэгчтэй итгэлцэлд суурилсан харилцаа тогтоох нь" сэдвийн хүрээнд 8 цагийн сургалтад 26 сэтгэл зүйчийг хамруулж сертификат олгосон байна.

Сэтгэл зүйн салбарт ажиллаж буй мэргэжилтэн, мэргэжлийн ур чадварын хувьд тасралтгүй өсөж, хөгжиж, суралцах ёстой. Тиймээс чадавхжуулах сургалтыг сар бүр тодорхой сэдвийн хүрээнд зохион байгуулж хэвшжээ.