НҮБ-ын Ерөнхий Ассамблейн шийдвэрээр 2007 онд НҮБ-ын гишүүн орнуудыг аутизмын хүрээний эмгэгтэй хүмүүсийг ойлгуулж таниулах үйл ажиллагаа зохион байгуулахыг уриалсан байдаг. Улмаар жил бүрийн дөрөвдүгээр сарын 2-ны өдрийг “Аутимзыг таниулах дэлхийн өдөр” болгон 2008 оноос тэмдэглэх болсон юм.

Дэлхий дахинд энэ өдрөөр аутизмтай хүмүүс болон тэдний гэр бүл, асран хамгаалагчдыг илүү ойлгож, дэмжих, хүлээн зөвшөөрөх зорилгоор ээлтэй, олон нийтэд чиглэсэн үйл ажиллагаа зохион байгуулах, боловсрол, хөдөлмөр эрхлэлт, эрүүл мэндийн тусламж үйлчилгээг жигд хүртэх боломжийг сайжруулахыг уриалдаг.

Аутизмын эмгэг нь хэл ярианы хөгжил, баригдмал сэтгэлгээ болон нийгэмшихүйн хөгжлийн хоцрогдол зэрэг бэрхшээлээр илэрдэг тул эцэг, эхчүүд энэхүү эмгэгийг эрт үед нь илрүүлж, мэргэжлийн хүмүүст хандсанаар хүүхдийг бие даан амьдрах чадвартай болгох бүрэн боломжтой юм. Түүнчлэн эрт оношилж шаардлагатай зан үйлийн эмчилгээг хийснээр тухайн хүүхдийн хөгжлийг дэмжиж, амьдралын чанарыг дээшлүүлэх чухал ач холбогдолтой. Оношилгоог ихэвчлэн хүүхдийн зан байдал, хөгжлийн түвшнийг ажиглах замаар хийдэг ажээ.

Ташрамд дурдахад, Монгол Улсын хэмжээнд энэ хичээлийн жилд хүүхдийн цэцэрлэгт 1008, ерөнхий боловсролын сургуульд 1275, мэргэжлийн болон техникийн сургуульд 18, насан туршийн суралцахуйн төвд 5, нийт 2306 аутизмын хүрээний эмгэгтэй суралцагч суралцаж байна.