Улсын хөдөлмөр, нийгмийн түншлэлийн гурван талт 2026-2028 оны хэлэлцээрийн хамтын хэлэлцээг дөрөвдүгээр сард эхлүүлнэ.

Хөдөлмөр, нийгмийн түншлэлийн гурван талт Үндэсний хорооны энэ оны тогтоолоор “Улсын хөдөлмөр, нийгмийн түншлэлийн гурван талт 2026-2028 оны хэлэлцээр”-ийн төслийг боловсруулах чиг үүрэг бүхий нийгмийн түншлэлийн хамтарсан ажлын хэсэг өнгөрсөн хоёрдугаар сарын 5-наас 3 дугаар сарын 25 хүртэл 5 удаа хуралдан хэлэлцээрийн төслийг боловсрууллаа. Ажлын хэсгийг ГБХНХ-ын дэд сайд Б.Солонгоо ахалж, хөдөлмөр эрхлэхийг дэмжих, хөдөлмөрлөх эрх, нийгмийн хамгааллын баталгааг хангах, цалин хөлс, орлогын талаар баримтлах бодлого, нийгмийн түншлэл, тэгш байдал гэсэн чиглэлээр төслөө боловсруулсныг ГБХНХЯ мэдээллээ.

Улсын хэлэлцээрийн төсөлд ажилтны эрх, хууль ёсны ашиг сонирхлыг хамгаалах МҮЭХ-ноос 52, ажил олгогчийн эрх, хууль ёсны ашиг сонирхлыг хамгаалах МАОЭНХ-ноос 30, Засгийн газрын төлөөллөөс 27 гээд нийт 109 санал ирүүлснийг хэлэлцэн, нэгтгээд улсын хэлэлцээрийн хамтын хэлэлцээг эхлүүлэх бэлтгэл хангаж байна.

Хамтарсан ажлын хэсэг тус хэлэлцээрийг боловсруулахдаа нийгмийн гурван талт түншлэлийг бүх түвшинд сайжруулах, улс, салбар, салбар дундын хэлэлцээр, хамтын гэрээ, хэлэлцээрт туссан асуудалд ул суурьтай хандан, талууд үүрэг хариуцлагаа хүлээж, хэрэгжүүлдэг жишиг, соёл бий болгох мөн өмнөх хэлэлцээртэй уялдуулан сайжруулах, зорилт төлөвлөгөөгөө оновчтой төлөвлөхөд анхаарчээ.