Өмнөговь аймгийн Цогтцэций сумын ЗДТГ, орон нутгийн өмчит Тавантолгой компанитай хамтран усны өдрийн хүрээнд нөлөөллийн ажлыг энэ сарын 23-ны өдөр зохион байгууллаа.

Тус ажлын хүрээнд ЕБС-ын сурагчдын дунд ”Ус ба тэгш эрх” сэдэвт гар зураг, эсээ, рийл, контент бүтээх уралдаан явуулж, шилдгүүдийг тодрууллаа.

Эсээ бичлэгийн уралдаанд 2 дугаар сургуулийн 6а ангийн сурагч Н.Эгшиглэн, 1 дүгээр сургуулийн 9а ангийн сурагч Б.Ариунжаргал, 2 дугаар сургуулийн 8г ангийн сурагч Н.Гэгээнхүслэн нар тэргүүллээ.

Гар зургийн уралдаанд 1 дүгээр сургуулийн 5б ангийн сурагч Т.Анужин, 2 дугаар сургуулийн 2д ангийн сурагч Б.Үлэмж, 2д ангийн сурагч Н.Солонго, рийл бичлэгийн уралдаанд 2 дугаар сургуулийн 8г ангийн сурагчид, 2 дугаар сургуулийн 12а ангийн сурагч Х.Ууганбаатар нар тус тус байр эзэлж ивээн тэтгэгч компаниудын өргөмжлөл мөнгөн шагналаар шагнууллаа.

Усны үнэ цэн, ач холбогдлыг ирээдүй хойч үрсдээ таниулах, усыг зөв зохистой ашиглах ойлголтыг өгөх нөлөөллийн ажлуудыг үе шаттай хэрэгжүүлж байгаа бөгөөд өдөрлөгт ШУТИС-ийн техникийн ухааны доктор, профессор Н.Насанбаяр, Цэнгэг усны нөөц, байгаль хамгаалах төвийн мэргэжилтэн Д.Цогтбаяр, С.Бямбабаяр нар зочин илтгэгчээр уригдан сурагчид болон иргэдэд мэдлэг мэдээллийг олголоо.

Цогтцэций сум усны хомсдол ихтэй, гадаргын усгүй, сав газрын хэмжээнд олон худагтай ч нөөц нь хязгаарлагдмал бүс нутаг юм.

Тавантолгойн ордод үйл ажиллагаа явуулж буй компаниуд, ялангуяа Эрдэнэс Тавантолгой болон хувийн хэвшлийн уурхайнууд, усны нөөцийг хамгаалах, хэмнэх чиглэлээр үе шаттай ажлуудыг хэрэгжүүлж байна.

Тодруулбал, уурхайн технологийн усыг баяжуулалт, угаалт, хөргөлт зэрэгт ашигласны дараа дахин эргүүлж ашиглах системийг нэвтрүүлсэн бөгөөд Цогтцэций суманд хоногт 1200 м.куб ус цэвэрлэж, дахин ашиглах байгууламж ажиллаж байна. Мөн үер, борооны усыг хуримтлуулж хөв цөөрөм байгуулан мод тарих, мал, амьтныг услах зэрэгт өргөн ашиглаж байна.