Харилцаа холбооны зохицуулах хороо, НҮБ-ын Хүүхдийн сан хамтран ТЭСО группийн санхүүжилтээр “Хүүхдийг цахим орчинд хамгаалъя” төслийг хэрэгжүүллээ.

Төслийн хүрээнд хүүхдийн насны онцлогт тохирсон, эцэг эх, асран хамгаалагч, багш сурган хүмүүжүүлэгчдэд зориулсан зорилтот видео хичээлийг бэлтгэн хүргэв.

Эдгээр хичээлийг НҮБ-ын Хүүхдийн сангийн олон улсын туршлага болон багш, нийгмийн ажилтнуудын оролцоотой боловсруулан, улсын хэмжээнд үйл ажиллагаа явуулж буй 887 сургуульд түгээх юм. Видео хичээлүүд нь сурагчид заавал судлах агуулга болохоос гадна сургуулийн ажилтан, эцэг эхчүүдийг ч мөн сургахад ашиглах аж.

Видео хичээлийг танилцуулах өдөрлөгийг нийслэлийн ерөнхий боловсролын 16 дугаар сургуульд өнөөдөр зохион байгууллаа.

Хүүхдийн цахим орчны хэрэглээ өсөхийн хэрээр багш, сурган хүмүүжүүлэгч, эцэг эх, асран хамгаалагчдад энэ талын мэдлэг, мэдээлэлтэй байх шаардлага мөн давхар бий болсон. Судалгаанаас харахад багш, сурган хүмүүжүүлэгч нарын 33 хувь нь тусгайлсан хөтөлбөр байхгүйн улмаас цахим орчинд ямар нэгэн байдлаар хүчирхийлэлд өртсөн хүүхдэд зөвлөгөө өгөх чадваргүй гэж өөрсдийгөө дүгнэсэн байна.

Эцэг, эхчүүдийн 91 хувь нь өөрийн хүүхдээ цахим орчны халдлагад өртөж байгаагүй гэдэг. Гэтэл хүүхдүүдийн 87 хувь нь цахим орчны халдлагад өртөж байсан. Цахим дарамтад өртсөн хүүхдүүдийн нь 59 хувь нь эцэг, эхдээ хэлдэггүй. Хүүхэд эрсдэлтэй нүүр тулж байгаагаа эцэг эхдээ хэлэхгүй, эцэг эх нь энэ талаар мэдэхгүй байна гэдэг нь цахим халдлагаас үүдэн гарах сөрөг нөлөөг улам ихэсгэж, гүнзгийрэх нөхцөл болж байна. Иймд төслийн хэрэгжилт цаг үеэ олсон чухал ажил болсныг өдөрлөгт оролцсон хүүхэд, багш, эцэг эхчүүд хэлж байлаа.

НҮБ-ын Хүүхдийн сангийн Шадар суурин төлөөлөгч Яан Му, “Хүүхдийг хамгаалах нь нийгмийн бүх салбарын хамтын үүрэг үздэг. ТЭСО групп шиг хувийн хэвшлийн байгууллагууд хүүхдийн сайн сайхны төлөө нийгмийн хариуцлагын хүрээнд бодит хөрөнгө оруулалт хийж байгаа нь үлгэр жишээ болохуйц хамтын ажиллагаа болж байна” хэмээн онцлов.

Төслийн 350 сая төгрөгийн санхүүжилтийг ТЭСО группээс нийгмийн хариуцлагын хүрээнд гаргажээ.