Нийтийн тээврийн бодлогын газар "Дата дэүс" ХХК-тай хамтран нийтийн тээврийн чиглэлийн маршрутын самбарын автоматжуулалтын системийг шинэчилж дуусах шатандаа орж байна. Энэхүү төсөл нь нийтийн тээврийн зогсоолуудад байрлах чиглэл, маршрутын мэдээллийг нэгдсэн стандарт, технологид суурилсан автоматжуулсан зураглалын систем боловсруулж автобусны зогсоолын самбарыг олон улсын стандартад нийцүүлэн хэрэглэгчдэд хүртээмжтэй болгох зорилготой юм.
Нийтийн тээврийн бодлогын газрын дарга Г.Билгүүн болон Тээврийн бодлого судалгааны хэлтсийн ажилтнууд "Дата дэүс" ХХК-ийн захирал Ж.Болор, төслийн менежертэй уулзаж, хамтран хэрэгжүүлж буй төслийн ажлын явц, сайжруулах зүйлсийн талаар санал солилцлоо.
Нийтийн тээврийн чиглэлийн маршрутын самбарын зураглалыг автоматаар гаргадаг болсноор чиглэл болон зогсоолд гарч буй өөрчлөлтүүдийг автоматаар хурдан тусгах, бүх зогсоол дээрх мэдээллийг нэгэн жигд стандартын дагуу боловсруулах гэх мэт олон давуу тал бий болно.
