Худалдаа, хөгжлийн банк Япон-Монголын бизнесийн түншлэлийн уулзалтыг Японы гадаад худалдааг дэмжих байгууллага /JETRO/-тай хамтран өчигдөр зохион байгууллаа.

Энэхүү уулзалтыг гурав дахь удаагаа зохион байгуулж байна. Энэ үеэр тус байгууллагын Бизнес хөгжлийн газрын захирал Нориказу Мори эхний жилүүдэд мэдээллийн технологи, инновацын чиглэл давамгайлж байсан бол энэ удаад илүү өргөн цар хүрээг хамарсан байгууллагууд оролцож байна. Тухайлбал, сансар судлал зэрэг шинэ, өндөр технологийн салбарууд нэмэгдсэн нь онцлог гэдгийг тодотгов.

Мөн тэрбээр "Гурван өдрийн турш бизнесийн уулзалт, нетворкинг зохион байгуулсан. Энэ хугацаанд үүссэн харилцаа холбоог улам бататгах, хамтын ажиллагааг бодит үр дүнд хүргэх зорилгоор уулзалт зохион байгуулж буйгаараа чухал ач холбогдолтой юм. Олон салбарынхан оролцож байгаагаас онцолбол, эмнэлгийн зориулалтаар цус тээвэрлэх технологи хөгжүүлдэг компани, нарны хавтангийн чиглэлээр үйл ажиллагаа явуулдаг байгууллагууд хүрэлцэн ирсэн. Энэхүү хамтын ажиллагаа нь хоёр улсын хөгжил цэцэглэлтийг улам дэмжиж, түншлэлийг шинэ шатанд гаргахын зэрэгцээ Монгол, Японы хамтарсан шинэ бизнесийг бий болгох бодит боломж бүрдүүлнэ гэдэгт итгэлтэй байна" хэмээв.

ХХБ-ны Токио дахь төлөөлөгчийн газрын даргын үүрэг гүйцэтгэгч Ж.Мягмардорж ярихдаа, "Манай төлөөлөгчийн газрын үндсэн зорилго нь Японы бизнес эрхлэгчдэд Монгол Улсыг илүү сайн таниулах, мөн Японы компаниудыг Монголын зах зээлд амжилттай нэвтрүүлэхэд бүх талаар дэмжлэг үзүүлэхэд чиглэж байна. Тухайлбал, компаниа хэрхэн байгуулах, дансаа хэрхэн нээх, үйл ажиллагаагаа хэрхэн эхлүүлэх, цаашлаад Монголд ирсний дараа ямар бизнесийн түншүүдтэй хэрхэн хамтран ажиллах зэрэг бүх шатанд зөвлөгөө, мэдээлэл өгч, зуучлан дэмждэг. Өнөөдрийн байдлаар манай төлөөлөгчийн газраар дамжин 96 Японы компани Монгол Улсад нэвтэрч, үйл ажиллагаагаа явуулж байна. Эдгээр компанийн цар хүрээ жил ирэх тусам өргөжин тэлж байгаа нь бидний ажлын бодит үр дүн юм.  Мөн ХХБ-ны харилцагч байгууллагууд оролцож, талууд хоорондоо нетворкинг хийж, бизнес уулзалтуудыг зохион байгуулан шинэ санаа, хамтын ажиллагааны боломжуудыг хэлэлцэж байна"  гэв.

Тус уулзалтад  27 Японы компанийн 40 гаруй төлөөлөгч оролцсон банйа. Мөн энэ төрлийн нетворкинг болон бизнес уулзалт идэвхтэй зохион байгуулж, Монгол, Японы бизнес эрхлэгчдийг илүү ойр холбох зорилготой ажиллах аж.