Аймгийн хэмжээнд өвөлжилт хүндэрсэн газруудын малчин айл өрхүүд сумын төв рүүгээ хүрэх болон айл хоорондын нийт 2400 км зам гаргахаар өнөөдрөөс ажиллаж эхэллээ. Дашбалбар, Гурванзагал, Чойбалсан, Цагаан-Овоо, Халх гол сумдын нийт нутгаар цагаанаар зудархуу байна. Одоогоор Чулуунхороот суманд 200 гаруй км зам гаргаж, 21 айл өрхөд хүрсэн бол Гурванзагал суманд зам гаргахаар ажиллаж байна. Халх гол суманд аймгийн Онцгой комисс үргэлжлүүлэн ажиллаж байна.
Түүнчлэн аймгийн Засаг даргын захирамжаар 13 суманд 45 тн тэжээл, хоёр суманд 126 тн өвс, 146 тн тэжээл, 19,5 тн өвсийг үнэ чөлөөлж, Дашбалбар суманд 3000 боодол өвсийг 3000 төгрөгөөр олгох шийдвэрийг гаргалаа.
Өнөө шөнөөс гуравдугаар сарын нэгэнд шилжих шөнө, мөн 2-ны өдөр Дорнод аймгийн нутгийн төв болон өмнөд хэсгээр, 2-ноос 3-нд шилжих шөнө, 3-ны өдөр нийт нутгаар цас орж, цасан шуурга шуурахыг УЦУОШТ-өөс анхааруулж байна. Энэ үеэр салхи их төлөв баруун хойноос секундэд 5-10 метр, 2, 3-нд ихэнх нутгаар зарим үед секундэд 16-18 метр хүрч ширүүснэ. Шөнөдөө -25...-30 градус, өдөртөө -12...-17 градус хүйтэн байна гэв.
