Говь-Алтай аймгийн Есөнбулаг суманд дэлхийн жишигт нийцсэн, дөрвөн улирлын тоглоомын төв бүхий “Хүүхэд хөгжлийн төв” ашиглалтад орно.

Энэхүү хөгжлийн төвийг АНУ-аас Говь-Алтай аймгийг зорин ирж амьдарч буй Бобби Клейтоны гэр бүр өөрийн хөрөнгө оруулалтаар үүсгэн байгуулж байна.

Тэднийх 2010 оноос Монгол Улс тэр тусмаа Говь-Алтай аймагт амьдрахаар төлөвлөсөн ба таван жилийн өмнө АНУ-аас тус аймгийг зорин ирж суурьшжээ. Амьдрах хугацаандаа энэ нутгийн ард иргэдэд юу тулгамдаж байна, ямар хэрэгцээ нэн чухал байна вэ гэдгийг олж хараад бага насны хүүхэдтэй гэр бүл болон аюулгүй орчинд жилийн аль ч улиралд хүүхэд багачуудыг хүлээж авах, ашиглах боломжтой тоглоомын төвийг байгуулахыг зорьжээ. Тэд зүгээр нэг байгууламж бус монгол ахуй, тэр тусмаа Говь-Алтай аймгийн онцлогийг илтгэсэн дотоод орчин бүрдүүлэхийг чухалчилсан байна.

Бобби Клейтон хэлэхдээ: -“Манайх долоогоос доош насны дөрвөн хүүхэдтэй. Иймд бага насны хүүхэдтэй гэр бүл, хүүхэд багачуудын чөлөөт цагаа өнгөрөөх аюулгүй тайван орчин нөхцлийг бүрдүүлэхээр дэлхий дээрх хамгийн сүүлийн үеийн технологийг нэвтрүүлж, хамгийн шилдэг дизейнараар дотор засал хийлгэн тав тухтай, амар амгалан газрыг бий болгохыг зорьж байна” гэв.

Ил төв нь хүүхдэд зориулсан аюулгүй байдлыг хангасан орчин үеийн тоглоомын өрөөнөөс гадна эцэг эх, насанд хүрэгчдэд зориулсан халуун кофе, цай, хоолоо идэх тайван амгалан орчинд ярилцах, түр амсхийх гол хэсгээс бүрдэж буй аж.

Хүүхэд хөгжлийн төвийг зөвхөн бага насны хүүхэдтэй гэр бүлд зориулсан гэх нь өрөөсгөл юм. Энд бүх насныхан гэр бүл, найз нөхөд, хамт олноороо зорин ирж тайван орчинд чөлөөт цагаа өнгөрүүлэх, сургалт хичээлд хамрагдах боломжтой юм. Тодруулбал, сэтгэл хөдлөл, сэтгэл зүй, нийгмийн хөгжил, хувь хүний хөгжилд чиглэсэн сургалт хичээлүүд хөтөлбөрийн дагуу энд явагдахаараа ихээхэн онцлогтой ажээ.

Хамгийн гол нь хэсэгхэн зуур хэдхэн минут ч амсхийхдээ амар тайван, чимээгүй орчинд байх орчин нөхцөлийг бүрдүүлэхийг зорьж буйгаа үүсгэн байгуулагч Бобби Клейтон онцлон хэлж байлаа.

Говь-Алтай аймаг бол бидний гэр. Говь-Алтайчуудад манай гэр бүлийн өгч чадах, хүсч зорьсон ажил удахгүй биелэлээ олох гэж байгаад маш их баяртай байна. Хамгийн гол нь дэлхийн жишигт нийцсэн байгууламж, тодруулбал хамгийн сүүлийн үеийн агааржуулалтын, халаалтын систем, орчин үеийн технологиор “Хүүхэд хөгжлийн төв”-ийг Говь-Алтай аймгийн Есөнбулаг сумд байгуулж байгаадаа баяртай байна гэдгээ илэрхийлж байв.

Дэлхийн зэрэглэлийн гэгдээрээ онцлогтой ил төвөө энэ оны зургаадугаар сард ашиглалтад оруулж үүд хаалгаа нээхээр зэхэж буй аж.