Өвөл, хаврын улиралд хурдан морины уралдаан, сунгаа, үсэргээнд хүүхдийг оролцуулах нь тэдний амь болон эрүүл мэндэд ноцтой эрсдэл учруулж болзошгүй гэдгийг мэргэжлийн байгууллагууд анхаарууллаа.

Монгол Улсын Засгийн газрын 2019 оны нэгдүгээр сарын 30-ны өдрийн 57 дугаар тогтоолоор жил бүрийн 11 дүгээр сарын 1-ний өдрөөс 5 дугаар сарын 1-ний өдрийг хүртэлх хугацаанд хурдан морины уралдаан, сунгаа, үсэргээнд 18 хүртэлх насны хүүхдийг хурдан морь унуулахыг хориглосон.

Тогтоол, шийдвэрийг хэрэгжүүлэх хүрээнд Мөрөн сумын Засаг даргын захирамж гарч, Мөрөн сумын нутаг дэвсгэрийн хэмжээнд энэ оны 5 дугаар сарын 1-ний өдрийг хүртэлх хугацаанд хурдан морины уралдаан, сунгаа, үсэргээ зохион байгуулахыг хориглолоо.

Иймд уяач, эцэг эх, асран хамгаалагчид хүүхдийн эрхийг нэгдүгээрт тавьж, төрийн бодлого, шийдвэрийг мөрдөхийг уриалж байна. Түүнчлэн хүүхдийн эрх ашгийг хамгаалж, өвөл, хаврын улиралд 18 нас хүрээгүй хүүхдийг хурдан морины уралдаан, сунгаа, үсэргээнд оролцуулахгүй байхыг уриалав.

Заасан хугацаанд хурдан морины уралдаан, сунгаа, үсэргээ зохион байгуулсан тохиолдолд хууль хяналтын байгууллагаас хариуцлага тооцохыг анхаарууллаа.