Хөвсгөл аймгийн Рэнчинлхүмбэ сумын Хилтийн хилт орчимд, Цагааннуур сумаас Мөрөн сум руу Хөвсгөл нуурын мөсөн дээгүүр зорчиж явсан суудлын авто машин энэ сарын 11-ний өдрийн 21:30 орчимд хар хил рүү оржээ. Зорчигчид авто машинаасаа эсэн мэнд гарсан дуудлага аймгийн Онцгой байдлын газарт иржээ.
Дуудлагын дагуу аймгийн Онцгой байдлын газрын Эрэн хайх, аврах салбар, Хатгал тосгон дахь Гал түймэр унтраах, аврах 69 дүгээр ангийн алба хаагчид очиж, авто машинд зорчиж явсан 4 хүнийг тээвэрлэн Хатгал тосгоны Эрүүл мэндийн төвд хүлээлгэн өгсөн бөгөөд зорчигчдын биеийн байдал хэвийн байна.
Харин УАЗ-3962 загварын суудлын авто машин баруун урд болон хойд дугуйгаар хар хил рүү орж хазайсан байсныг татан гаргасан байна.
Хөвсгөл нуурын мөсний зузаан харилцан адилгүй, зарим газраар нимгэн байгаа тул иргэд, малчид, аялагчид болон тээвэрчдийг мөсөн дээгүүр зорчихгүй байхыг Хөвсгөл аймгийн Онцгой байдлын газраас сэрэмжлүүллээ.
Сэтгэгдэл (1)