Иргэдийн дунд алт, жонш, үнэт чулууг хууль бусаар олборлодгоос болж монголын байгаль сүйрч буй ойлголт түгсэн тул тэднийг бодит мэдээллээр ханган, хууль бус ашигт малтмал олборлогчидтой хатуу тэмцэх шаардлагатайг АҮЭБ-ийн дэд сайд Б.Энхтүвшин тэмдэглэлээ.
Тэрбээр энэ тухайгаа аж үйлдвэр, эрдэс баялгийн салбарын хяналтын улсын байцаагчдын нэгдсэн зөвлөгөөний үеэр тодотгоод, УИХ-ын хаврын чуулганаар Ашигт малтмалын тухай хуульд нэмэлт өөрчлөлт оруулах хуулийн төслийг өргөн барихад бэлэн болсныг дурджээ.
Зөвлөгөөнд оролцогчид орон нутагт мэргэжлийн боловсон хүчин дутагдалтай байгаа болон хөдөлмөрийн аюулгүй байдал, эрүүл ахуйг хангах, менежментээ боловсронгуй болгох, эрдэм шинжилгээний ажлын өгөөжийг дээшлүүлж үйлдвэрлэлд нэвтрүүлэх, зах зээлийн эдийн засгийн механизмыг сайтар ашиглах хэрэгтэй байгааг хэлж байлаа. Энэ бүхэнд аж үйлдвэр эрдэс баялгийн салбарын улсын ахлах байцаагчдын үүрэг оролцоо чухлыг дэд сайд онцолсон юм.
АМГТГ-ын удирдлагууд, нийслэл, 21 аймгийн улсын байцаагч нар оролцож буй зөвлөгөөнийг цаашид жил бүр зохион байгуулж, ямар чиг үүрэгтэй ажиллах үүрэг чиглэлээ тодорхойлох ажээ.
