БНХАУ-ын Алтай аймгийн Шиньжяны Ваньюань биотехнологийн группийн ерөнхий захирал Чен Ганлян, дэд захирал Гуо Жичян, хөрөнгө оруулалт хариуцсан захирал Хуантин болон бусад инженер техникийн ажилтнууд Ховд аймагт зочиллоо.
Тус ажлын баг энэ сарын 3, 4-нд Ховд аймагт ажиллах юм.
Ажлын баг өнөөдөр Ховд аймгийн Засаг дарга М.Амарсанаа болон холбогдох албаны төлөөлөлтэй уулзлаа.
Уулзалтын үеэр Ховд аймагт ингэний сүүний үйлдвэр байгуулах асуудлаар ярилцжээ.
Мөн үйлдвэр барих асуудлыг судлах, газар дээр нь танилцах, хөрөнгө оруулалт, дэд бүтэц болон гааль, татвар, хөнгөлөлт урамшууллын талаар санал солилцов.
Улмаар хамтарсан ажлын баг байгуулж, үйлдвэр барих ажлыг эрчимжүүлэхээр болжээ.
Өнгөрсөн оны нэгдүгээр сард Ховд аймгийн Засаг дарга М.Амарсанаа БНХАУ-ын Алтай аймагт албан айлчлал хийх үеэрээ Алтай хотын Буурал тохой сумын Шиньжян Ванюань ингэний сүүний үйлдвэр - биотехнологийн корпорацтай танилцаж, тус үйлдвэрийн салбарыг орон нутагтаа нээж хамтран ажиллах талаар санал солилцсон юм. Энэ ажлын үр дүнд холбогдох албаны төлөөлөл ийнхүү Ховд аймагт ажиллаж байгаа талаар ЗДТГ-ын цахим хуудсаар танилцуулав.
