ЦХИХХЯ энэ оныг “Их өгөгдөл, хиймэл оюуны жил” болгон зарлаж, дижитал шилжилт, инновацын бодлогыг эрчимжүүлэхийг зорьж байна.

Энэ талаар ЦХИХХ-ны сайд Э.Батшугар Тэргүүн шадар сайд бөгөөд Эдийн засаг, хөгжлийн сайд Ж.Энхбаяртай уулзан, 2026–2027 онд тус салбарт хэрэгжүүлэх бодлого, хөтөлбөр, эрх зүйн шинэчлэлийн талаар санал солилцох үеэрээ танилцуулав.

Одоогоор дэлхийн 89 улс их өгөгдөл, хиймэл оюуны стратегиа баталсан бөгөөд Монгол Улс эдгээр орноос үндэсний онцлог, давуу талаараа ялгарч өрсөлдөх шаардлагатайг Э.Батшугар тэмдэглээд, уул уурхай, байгаль орчны салбарт суурилсан хиймэл оюуны шийдлийг хөгжүүлж, тулгамдсан асуудлыг технологиор шийдэх нь манай улсын боломж гэдгийг хэлж байлаа.

Иргэдийн цахим ур чадварыг дээшлүүлэх “Бүх нийтийн цахим ур чадварын 6-р аян”-ыг энэ жил Улаанбаатар хотод зохион байгуулах юм.

Түүнчлэн, хиймэл оюун, өгөгдөл, цахим худалдаа, гарааны бизнесийг дэмжих, сансар, дронтой холбоотой шинэ хуулийг УИХ-д өргөн барихаар төлөвлөөд байгааг ЦХИХХЯ мэдээлэв.

Сайд Ж.Энхбаяр цахим хөгжил, инновац, харилцаа холбооны салбар нь Монгол Улсын ДНБ-ий 2.5 хувийг бүрдүүлж буйг онцлон, салбарын бодлогыг хэрэгжүүлэх, эрх зүйн орчныг шинэчлэх, төрийн их өгөгдлийг эдийн засгийн эргэлтэд оруулах замаар үр өгөөжийг нэмэх, төр хувийн хэвшлийн түншлэлийг өргөжүүлэх шаардлагатайг тэмдэглэжээ.

Мөн үндэсний хэмжээний GPU кластер төв байгуулах, монгол хэлний хиймэл оюуны загварыг хөгжүүлэх, салбарын хүний нөөцийг бэлтгэх, төрийн албан хаагчдын чадавхыг сайжруулахыг бодлогоор дэмжиж, хамтран ажиллахаа илэрхийллээ.