Нийслэлийн Аялал жуулчлалын газар, Монголын адуучдын холбоо, Тэнгэрийн нүүдэлчин төсөл, Хушхан брэнд хамтран зохион байгуулсан "Талын жавхаа-2026" адууны соёлын өдөрлөг “Чингис хааны хүрээ” аялал жуулчлалын цогцолборт энэ сарын 24-нд боллоо.
Өвлийн аялал жуулчлалыг дэмжих, нүүдэлчин ахуй, адууг дагасан соёлыг сурталчлах, монгол адууны үнэ цэнийг өсгөх, соёлын биет бус өвийг хадгалан, залуу хойч үедээ өвлүүлэх, адууг брэнджүүлэх зорилготой уг өдөрлөгт 13 аймаг, 3 дүүргийн 37 адуучин оролцов. Адуучдын парадаар эхэлсэн тус өдөрлөгийн үеэр өвөл цагийн адуу маллах соёлын нэгээхэн хэсэг болох уурга, ташуур шүүрэх, эмнэг, хангал булгиулах, морьтой, явган уургалах, бугуйлдах зэрэг тэмцээн болж, шилдгүүдээ шалгаруулав.
Нэгдсэн дүнгээр Төв аймгийн Батсүмбэр сумын адуучин Р.Пүрэвдорж тэргүүн байрт шалгарч, Дорноговь аймгийн Дэлгэрэх сумын адуучин Ц.Гомбодорж дэд байрт, Хэнтий аймгийн Мөрөн сумын адуучин О.Цолмонбаатар гуравдугаар байрт, Булган аймгийн Баян-Нуур сумын адуучин Б.Баянбаатар дөрөвдүгээр байрт, Төв аймгийн Аргалант сумын адуучин Б.Баасансүх тавдугаар байрт шалгарсан юм.
Мөн үеэр үндэсний сайхан хувцастай шилдэг оролцогчийг шалгаруулж, зочдыг хээрийн цайгаар дайлав. Үүний зэрэгцээ монгол банхар, тайга нохой үзэх, үндэсний худалдаа үйлчилгээний хэсгээр зочлох зэрэг үзвэр, үйлчилгээ гарлаа.
