Дорноговь аймгийн Эрдэнэ сумын харьяат, БНМАУ-ын аварга малчин, эмнэг сургалтын спортын мастер Эрдэнийн Баярмагнай Монгол Улсын Ерөнхийлөгчийн зарлигаар Монгол Улсын гавьяат малчин цол, тэмдгээр шагнууллаа.
Төрийн нэр хүндтэй энэхүү шагналыг нэгдүгээр сарын 24-25-нд Дундговь аймгийн төвд болсон “Тэмээн дээрээс наран ойрхон” тэмээний наадмын үеэр Монгол Улсын Ерөнхийлөгч гардуулжээ.
Тэмээчин Э.Баярмагнай 2025 оны жилийн эцсийн мал тооллогын дүнгээр 1004 тэмээ тоолуулсан байна. Тэрбээр 1979 оноос мал маллаж эхэлсэн бөгөөд зах зээлийн үед өмч хувьчлалаар 20 гаруй тэмээтэй болсноор тэмээ өсгөж эхэлжээ.
Эхний үед малаа таван төрөлд өсгөж байсан бол сүүлдээ тэмээг дагнан маллажээ. Тэмээгээ хоньчилж малласнаар олон тоогоор өсгөх боломж бүрдсэн байна. Одоогоор тэднийх 300 гаруй ингэтэй бөгөөд 40 орчмыг сааж, ингэний хоормог, идээ, ундаа хийж зах зээлд нийлүүлдэг байна. Өнгөрсөн оны амжилтаараа тэрбээр сумын мянгат тэмээчний алдрыг хүртсэн билээ.
Тэрээр өмнө нь малаа таван төрөлд өсгөж, улсын аварга малчин цол хүртэж байжээ. Олон жилийн уйгагүй хөдөлмөрийн үр шимээр хоёр бөхтэй тэмээгээ мянга давуулан өсгөж, Дорноговь аймгийн хоёр дахь мянгат тэмээчин болж байна.
Мөн Дорноговь аймгийн хамгийн олон тэмээтэй Мандах сумын малчин Нямсүрэнгийн Баясгалан 2024 оны жилийн эцсийн мал тооллогын дүнгээр 1008 тэмээ тоолуулж байсан бол 2025 оны эцэст 1146 тэмээ тоолуулан тэмээгээ 138 толгойгоор өсгөжээ.
