Цагдаагийн ерөнхий газрын Хар тамхитай тэмцэх албанаас цаг үеийн асуудлаар өчигдөр мэдээлэл хийжээ.

Хар тамхитай тэмцэх албаны Урьдчилан сэргийлэх, хамтын ажиллагааны хэлтсийн дарга Ж.Төмөрбат ярихдаа, “НҮБ-ын хар тамхитай тэмцэх албанаас 2025 онд дэлхийд ойролцоогоор 500 мянга орчим гэмт хэрэг бүртгэгдэж, 1200 тн мансууруулах бодис хурааж авсан байна. Монгол Улсад орж ирж байгаа мансууруулах бодисын 50 хувийг шуудан хэлбэрээр оруулсан гэмт хэрэг бүртгэгдсэн. Энэ нь хил гааль, олон улсын хамтын ажиллагаа чухал байгааг харуулж байгаа юм. Монгол Улсын 47 иргэн гадаад улсад хар тамхитай холбоотой хэргээр ял эдэлж байна. Тэд Хятад, Солонгос, Турк, Малайз, Лаос, Япон зэрэг оронд бий. Үүний 63.6 хувь нь тээвэрлэсэн, 22.7 хувь нь улсын хилээр нэвтрүүлсэн байна. Тэгвэл манай улсад гадаадын 10 иргэн хар тамхитай холбоотой хэргээр ялж эдэлж байгаа. Сүүлийн есөн жилийн статистикаас гаргасан 2422 холбогдогчтой 2100 хэрэгт мөрдөн шалгах ажиллагаа явуулсан. Энэ нь нийт гэмт хэргийн 0.63 хувийг эзэлж байна. Нийслэлд 1749 гэмт хэрэг, орон нутагт 361 хэрэг бүртгэлтэй. Нийт илрүүлсэн хэргүүдээс 510 мянга гаруй хүний нэг удаагийн хэрэглээ бүхий хууль бус эргэлтийг таслан зогсоосон” гэв.

Хар тамхитай тэмцэх албаны гаргасан урьдчилсан дүнгээр таван жилийн дотор энэ төрлийн гэмт хэрэг 7-20, холбогдогчийн тоо 5-15 хувиар өсөх магадлалтай байгаа аж. Мөн хураасан мансууруулах бодис болон сэтгэцэд нөлөөт бодисын хэмжээ 10-40 хүртэлх хувиар огцом өсөх эрсдэлтэйг судалгаагаар тогтоожээ. Хар тамхи, мансууруулах бодистой холбогдсон иргэдийн 83.8 хувь нь эрэгтэй, 16.2 хувь нь эмэгтэй хүн байна. Энэ төрлийн гэмт хэрэгт холбогдож байгаа иргэдийн 60.4 хувь нь бүрэн дунд боловсролтой ажил гэсэн статистик гарсныг албаныхан онцлов. Тэгвэл далд хэрэглэгчийн тоог ДЭМБ-аас 15-64 насны 100 мянган хүн тутамд 2700 нь хар тамхи, мансууруулах бодис хэрэглэдэг гэж үзсэн байна. Харин манай улсад дунджаар 30 мянга орчим далд хэрэглэгч байх магадлалтай аж.

Хар тамхитай тэмцэх газрыг албанаас энэ төрлийн гэмт хэргээс урьдчилан сэргийлэх чиглэлд хэвлэл мэдээллийн 98 байгууллатай хамтран ажиллаж, олон улсын байгууллагын 210 сургалтад 30 мянга орчим хүнийг хамруулсан байна.