2023 онд баталсан Монгол Улсын “Боловсролын ерөнхий хууль”-ийн шинэчилсэн найруулгын 8 дугаар зүйлийн 8.1-д “Сургалт нь танхимын, танхимын бус, эдгээрийн хосолсон хэлбэрийн зохион байгуулалттай байна” хэмээн тусгасан.

Энэ дагуу  Боловсролын сайдын 2024 оны долоодугаар сарын 19-ний өдрийн “Хичээлийн жилийн бүтэц шинэчлэн батлах тухай” А/01 дүгээр тушаалыг хэрэгжүүлэх хүрээнд 2025-2026 оны хичээлийн жилийн 21 дэх долоо хоногт нийслэлийн ерөнхий боловсролын сургуулийн X-XII ангийн хичээл сургалтын үйл ажиллагааг цахим хэлбэрээр зохион байгуулахаар зохицуулжээ. Тиймээс нийслэлийн ерөнхий боловсролын сургуулиудын ахлах ангийн сурагчид өнөөдрөөс цахимаар хичээллэж эхэллээ.

Дэлхий нийтийн хөгжлийн чиг хандлага, нийгмийн хурдацтай өөрчлөлт, өнөөгийн нөхцөл байдлаас шалтгаалан бүхий л шатны боловсролын үйлчилгээнд орчин үеийн мэдээлэл, технологийн дэвшилд суурилсан цахим болон танхимын хосолсон хэлбэрийг нэвтрүүлэх хэрэгцээ шаардлага улам бүр нэмэгдэж байгаа өнөө үед цахим сургалтыг зохион байгуулах зайлшгүй шаардлага тулгарч байгаа юм.

Тэгвэл орон нутагт өнөөдрөөс сурагчдын хичээл танхимаар орж эхэлсэн байна.