Чингэлтэй дүүргийн 117 дугаар сургуулийн халаалтын зуухыг хийн түлшний системд шилжүүлж, өнөөдөр ашиглалтад хүлээн авсан талаар БОУАӨЯ-наас мэдээллээ.
Агаарын бохирдлыг бууруулах Үндэсний хорооны Ажлын алба татвар төлөгч томоохон аж ахуйн нэгжүүдтэй хамтран Улаанбаатар хотод үйл ажиллагаа явуулдаг 100 кВт-аас дээш хүчин чадалтай усан халаалтын зуухуудыг хийн түлшний системд шилжүүлж байгаа аж.
Ажлын албаны дарга С.Даваасүрэн "17 дугаар сургуулийн халаалтын зуухыг шинэчилж, хийн түлшинд шилжүүлсэн нь Чингэлтэй дүүргийн асуудал бус Улаанбаатар хотын агаар, орчны бохирдлыг бууруулахад нөлөөлөх чухал ажил" гэдгийг тэмдэглэв.
Тус сургуулийн халаалтын зуухыг шинэчилж, хийн түлшний технологид шилжүүлэх ажлыг “Бороо Гоулд” компани татварын нэг хувийн хөнгөлөлтөөр санхүүжүүлж, нийгмийн хариуцлагаа хэрэгжүүллээ. Гүйцэтгэчээр ажилласан “Газком” компани Монгол орны эрс тэс уур амьсгалд тэсвэртэй, 1.8 тоннын багтаамжтай нөөцийн босоо савыг тус сургуульд байршуулснаараа онцлог юм.
17 дугаар сургууль жилд 580 тонн түүхий нүүрс түлдэг. Халаалтын зуухыг шингэрүүлсэн хийн системд шилжүүлснээр жилийн 580 тонн түүхий нүүрсний хэрэглээг зогсоож, агаарт 2320 тонн хорт бодис ялгарахаас сэргийлэн, агаар орчны бохирдлыг бууруулж байна.
