Нийслэлд зам тээврийн оновчтой сүлжээг хөгжүүлэх зорилгоор “Олон түвшний уулзвар” төслийг хэрэгжүүлэхээр төлөвлөжээ. 

Эхний ээлжид Монос, МИТС, Офицеруудын ордны тойрог, Наадамчдын зам дахь явган хүний гүүрэн гарц, Нарт хотхоны зүүн далан дээрх гүүрэн байгууламж зэрэг таван байршилд төслийг хэрэгжүүлэх магадлалын ерөнхий дүгнэлт гаргасныг НЗДТГ-аас мэдээллээ.

Уулзваруудын түвшнийг зааглаж, олон түвшинтэй болгосноор тээврийн хэрэгслийн урсгалын огтлолцлыг багасгаж, гэрлэн дохионоос хамааралтай зогсох хүлээх хугацааг богиносгон, замын хөдөлгөөний нэвтрүүлэх чадварыг эрс нэмэх ач холбогдолтой. Тухайлбал, Баянзүрх дүүргийн “Нарт” хотхон орчимд үерийн хамгаалалтын далан нь замын сүлжээг тасалдуулж, жолооч нар Нарны зам, Энхтайваны өргөн чөлөөгөөр зайлшгүй тойрч зорчих шаардлагатай болж байна.

Энэ нь үндсэн замуудын ачааллыг нэмж, гамшгийн үеийн шуурхай бэлэн байдлыг ч хязгаарлаж байгаа юм. Иймд далан давуулан гүүрэн байгууламж барих нь замын холболтыг нөхөж, иргэдийн зорчих зай, хугацааг товчлох, хотын гол замуудын түгжрэлийг сааруулах оновчтой шийдэл болох юм. Өөрөөр хэлбэл, “Олон түвшний уулзвар” төслийг хэрэгжүүлснээр замын хөдөлгөөний дундаж хурд 7.1 хувиар нэмэгдэх ажээ.