НҮБ-ын Монгол дахь үйл ажиллагаа нь Монгол Улсын Засгийн газартай дижитал шилжилтийн чиглэлээр хамтын ажиллагааг улам бэхжүүлэхэд бүрэн бэлэн байгааг НҮБ-ын Монгол дахь суурин төлөөлөгч Яап ван Хиердэн ЦХИХХ-ны сайд Э.Батшугартай уулзах үеэрээ илэрхийллээ.

Ялангуяа хот, хөдөөгийн ялгааг багасгах, эдийн засгийг төрөлжүүлэхийг дэмжих, дижитал шийдлээр дамжуулан ядуурал, тэгш бус байдлыг бууруулахад бодит хувь нэмэр оруулахаа онцолсон байна.

Дээрх уулзалтын үеэр Монгол Улсын дижитал шилжилтийн бодлого, хэрэгжилт, цаашдын хамтын ажиллагааны талаар санал солилцсоныг ЦХИХХЯ мэдээлэв.

НҮБ-аас Монгол Улстай хамтран хиймэл оюуны орчны үнэлгээ, мөн НҮБХХ, НҮБ-ын Хүүхдийн Сан хамтран хэрэгжүүлсэн DEMOSC хөтөлбөр дижитал шилжилтийг өргөжүүлэхэд бодит үр дүнд хүрчээ. Түүнчлэн жижиг, дунд үйлдвэрлэл эрхлэгч болон албан бус бизнесийг дэмжих дижитал шийдэл болох Е-Бизнес платформын 2 дугаар хувилбарыг хөгжүүлэхэд Олон улсын хөдөлмөрийн байгууллага (ОУХБ) ЦХХХЯ, Е-Монголия академитай хамтран ажиллаж байгаа билээ.

Өнгөрсөн оноос хэрэгжүүлж эхэлсэн, 14-18 насны сурагчдыг хиймэл оюуны суурь мэдлэг, ур чадвараар хангах “Хиймэл оюуны 1000 элч” санаачилгыг НҮБ-ын Хүүхдийн сан дэмжихэд бэлэн гэдгийг Яап ван Хиердэн илэрхийлжээ.

Цаашид Монгол Улсын дижитал шилжилтийн залуусын чиглэл дэх тэргүүлэх хөтөлбөрийн бүрэлдэхүүн хэсэг болгох саналыг дэвшүүлээд, Олон улсын цахилгаан холбооны холбоо, Хүүхдийн Сан, ХХААБ нь НҮБ-ын уялдаа зохицуулалтын дор дижитал шилжилтийн хамтарсан шинэ хөтөлбөр боловсруулж буйг танилцуулав. “Ухаалаг малчид” хэмээн урьдчилсан байдлаар нэрлэсэн уг хөтөлбөр нь дижитал шийдлээр малчдын хамтын нийгэмлэгийг дэмжих, DEMOSC хөтөлбөрийн хүрээнд туршсан сургамж, загваруудад тулгуурлан хэрэгжих ажээ.