Азийн хөгжлиийн банкны дэмжлэгээр Онцгой байдлын байгууллагад гамшгийн эрсдэлийг багасгах зорилгоор “Гамшгийг сөрөн тэсвэрлэх чадавхыг бэхжүүлэх”, “Гамшгийн зарлан мэдээллийн нэгдсэн тогтолцоог бэхжүүлэх” төслийг хэрэгжүүлнэ.

Энэ талаар Монгол Улсын Шадар сайд Х.Ганхуяг АХБ-ны Зүүн Азийн газрын ерөнхий захирал Мухаммад Эхсан Ханыг өнөөдөр хүлээн авч уулзах үеэрээ ярилцсаныг ОБЕГ мэдээлэв.

Тухайлбал, “Гамшгийн зарлан мэдээллийн нэгдсэн тогтолцоог бэхжүүлэх” төслийн хүрээнд ороннутагт яаралтай тусламжийн төвүүд байгуулж, телевиз, фм, радио, гар утасны сүлжээгээр яаралтай сэрэмжлүүлэг түгээх аргыг нэвтрүүлж, мэдээллийг шуурхай дамжуулах, дохионы цамхгуудыг нэмэхийн зэрэгцээ алс бүсэд хүрэх хөдөлгөөнт холбооны нэгжийг байгуулахаар төлөвлөжээ. Мөн хүйсийн ялгаатай хэрэгцээг тусгасан гамшгийн эрсдэлийн хяналтын системийг бий болгож, нийслэл орчмын газар хөдлөлтийн хяналтын тоног төхөөрөмжийг шинэчилж, улс, орон нутгийн онцгой байдлын ажилтнуудад сургалт явуулж, сайн дурын бүлгүүдийг байгуулах ажээ.

Мөн “Гамшгийг сөрөн тэсвэрлэх чадавхыг бэхжүүлэх” төслийг хэрэгжүүлж, ой, хээрийн болон олон давхар барилга, үйлдвэрт гал түймэр гарах, үер ус, уурхай, цацраг хими, тэсрэх дэлбэрэх ослоос урьдчилан сэргийлэх, эрэн хайх, аврах, хор уршгийг арилгах, сэргээн босгох чадавхыг сайжруулахад шаардагдах техник, тоног төхөөрөмж, хамгаалах хувцас, багаж хэрэгслээр хангаж, байгууллага, мэргэжлийн анги, сайн дурынхан, иргэдийн гамшгаас хамгаалах чадавхыг дээшлүүлэхийг зорьж буйг уулзалтаар онцолжээ.