Монгол Улс ирээдүйд оршин тогтнох ёстой бол, монгол хүн гэж өөрөөрөө бахархаж, өв удмаа хадгалъя гэвэл үндэсний бичгээ залшгүй сурах ёстойг Соёлын гавьяат зүтгэлтэн, "Чингис хаан" одонт зохиолч, яруу найрагч Г.Мэнд-Ооёо тэмдэглэлээ.

Тэрбээр, ”Монгол бичиг бол өвөг дээдсийн минь хэдэн мянган жилийн өв, сэтгэлгээний онцлогийг түүхийн уртад бидний удмын санд уусан шингэтэл тээж хадгалж ирсэн. Зөвхөн монголд төдийгүй хүн төрөлхтний номын сан, архивт ч үнэтэй өвүүд нь бий. “Монголын сайхан бичигтэн” уралдаан жилээс жилд тэлж, ялангуяа орон нутгийн багш сурагчид идэвхтэй оролцдог. Монгол бичгээр гоё сайхан бичихийн зэрэгцээ уран бичлэгийн соёл, урлагийн хэл хэллэгүүд орж ирсэн нь энэ удаагийн уралдааны онцлог байлаа. Хүүхэд залуус, багш нар үндэсний бичгээ эрхэмлэн сурч, сайжруулж, хэл соёлыг эзэмшихийн төлөө хичээж байгааг харах сайхан байлаа” хэмээн Үндэсний мэдээллийн МОНЦАМЭ агентлагаас 29 дэх удаагаа зохион байгуулж буй "Монголын сайхан бичигтэн" олон улсын уралдааны шилдгүүдийг шалгаруулах ёслол, шилдэг бүтээлийн үзэсгэлэнгийн нээлтэд оролцох үеэрээ ярьсан юм.